Komîsyonê Zîndanê Hatayî yê ÎHDyî derheqê binpaykerdişê heqanê tepişteyan de raporêk amade kerd û bi kombîyayîşêkê çapemenîye rapor eşkera kerd.

Hemserekê ÎHDyî yê Hatayî Mursel Tonguç Salmanogluyî da zanayene ke înan tepişteyan Î.M., Î.M. û F.K.yê efrînijan reyde pêvînayîş kerd.

Tonguç Salmanogluyî pare kerd ke 3 tepişteyî 2018 de Efrîn de hetê cerganê OSOyî ra tepişîyayê û îşkence dî, dima zî teslîmê Tirkîyayî ameyê kerdene û Tirkîya de cezaya muebede werda. Salmanogluyî eşkera kerd ke Î.M. zîndan de maruzê îşkence bîyo û bi îşkence neçare mendo ke îfade îmza bikero.

Beyanê Î.M.yî wina yê:

''Ma 11 kesî bêeleqê hetê cerganê OSOyî ra tepişîyayî, maruzê îşkenceyê înan mendî. Hema zî bedenê ma de rêçê îşkenceyî est ê. Doktoran ne ma muayene kerdî ne zî rapor da ma. Ma tewrê çalakîyêke zî nêbîyî, eleqeyê ma bi qet yew rêxistine çin o. Cerganê OSOyî ma ardî Tirkîya û qereqol de leşkeranê tirkan reyde ma rê îşkence kerd. 3 serrî û 8 mengî yo ma nêeşkenê vengê xo bidê eşnawitene. Ma nêeşkenê keyeyê xo ra xeberêke bigêrê. Ma terkê qederê xo bîyî. Wa pêro dinya vengê ma bieşnawa. Wa pawitoxê heqanê merdiman vengê ma bieşnawê û bidê eşnawitene. Wa ma de pêvînayîş bikerê. Oyo ke ma vînenê neheqî ya.''