Zîndananê Vakurê Kurdîstanî û Tirkîya de bitaybetî vera tepişteyanê şorişgêr û welatperweran îşkence yeno kerdene. Pîya bi tecîrîdî bi tewîranê keyfîyan ê îdareyê zîndanî îşkence her roje zêdîyeno. Rixmo ke cezaya tepişteyanê şorişgêr û welatperweran qedîyena zî, ê nînê veradayene, cezayê neweyî yenê dayene û tehlîyeya înan  yena peydeeştene.

Îdareyê zîndanî bi caardişanê keyfîyan ceza dano tepişteyan û tepişteyê ke cezaya înan qedîyaya zî nînê veradayene. Heyetê Çimdarîye yê ke kanûna 2020 de ameyî ronayene hetê îqtîdarî wina ameyî mojnayene ke verê tehlîye akenê la eslê xo de nê heyetî verê tehlîyeya tepişteyanê sîyasîyan û nêweşan genê. Bitaybetî kesê ke 30 serre zîndan de mendê, tepişteyê sîyasîyê ke wextê tehlîyeya înan ameyo, verê înan genê. Nê heyetî çîyo ke destê înan ra yeno kenê ke ceza bidê tepişteyanê sîyasîyan. Bîlasebeb cezayî yenê dayene. Bi bahaneyanê sey poşman nêbîyî, zaf kitab wendî, wîyayî, deyîrê kurdkî vatî, zaf awe şuxulnaye, tewrê aktîvîteyanê zîndanî nebîyê û xeylêk sebebanê bînan ê bênayan ceza yena dayene û verdayîşê tepişteyan ke wextê ci ameyo yeno peydeeştene. Goreyê donayena ke ameye destfînayene tewr tay tehlîyeya 217 tepişteyanê sîyasîyan ameye peydeeştene. Înan ra tay hema zî nêameyî tehlîyekerdene.

Nameyê tay tepişteyan ke nêameyî veradayene wina yê: "Cevahir Vurucu, Ferit Orak, Şevket Bilici, Songul Bagadir,Ercan İşcan , Murat Aktaş, Fahriye Ceylan, Metin Guven,Aliye Suer, Resul Baltaci, Hatice Çakmak ,Duzce Çilimli, Kadir Karabak, Rojda Erez, Hanim Yildirim, Sabri Yakut, Hakan Zerturk, Bilal Balbeş, Faruk Aydemir, Şemsettin Tekin, Sevgi İlbog, Mehmet Cengel, Dilane Oynaş,Maya Haştîye Xense Bulut, Azize Yagız,Damla Erdem, Sevda Turgal, İlyas Peldek, Abdulhaluk Ozerk, Abdurrahim Çetinkaya.

Reyna Zîndanê Amedî de 8 tepişteyê sîyasîyî, Zîndanê Bayburtî 12 tepişteyê cinîyî, Zîndanê Sîcanî de hema hema pêro tepişteyî, Zîndanê Bolu de 12 tepişteyê sîyasîyî rixmo ke cezaya înan qedîyayî bi bahaneyanê cîya cîyayan nêameyî veradayene.