Deniz Kayayî bi nameyê tepişteyanê ke rayberîya Leyla Guvene de semedê wedartişê tecrîdê serê Rayberê Şarê Kurdî Abdullah Ocalanî  1’ê Adera ra heme zîndanan de grevê vêşanîye de yê  û 15 tepişteyê ke 30’ê Nîsane ra kewtê rojeyê mergî, derheqê pêvînayîşê avûkatanê Ocalanî de eşkerayîyêk daye.

Eşkrayîya  tepişteyanê PKK û PAJK’î wina ya:

''Ma rêça xovardayoxanê 14’ê Temuzze de semedê wedartişê tecrîdê serê Rayberîye bi qerardarîya girde grevê vêşanîye yê bêdem-agêrayîşê û rojeyê mergî  rê dewam kenê. Îqtîdarê AKP-MHP’yî semedê şiktişê xoverdayîşê ma polîtîkayanê cîya cîya yê şerê taybetî bica ano. 12’ê Çele de birayê Rayberîya ma şawit Îmrali la bi naye nêeşkeyî xoverdayîşê ma bişiknî. Nika zî bi heman polîtaka 2’ê Gulane de pêvînayîşêkê avûkatan da viraştene. Madeyê ke ma cuwa ver eşkera kerdîbî, heta nêrê qebûlkerdene û hetê wezîrîya edaletî nêrê bicaardene, xoverdayîşê ma do dewam bikero. Wa hol bero zanayene ke binê heme şertan de heta ke tecîrd mêro wedartene ma do çirew tewîz medê. Teber de dayîkê ma zere de ewladê înan xover danê. Xoverdayîş ganî hîna bêro girdkerdene. Ganî heme hetê demokratî paştî bidê nê xoverdayîşî. Bê xoverdayîşî yewna rayîr çîn o.‘‘