Rojnameger Huseyîn Aykolî meqaleya xo ya rojnameyê Yenî Yaşamî de bale ante meseleyêka bîne ya zîndanan ser.

Aykolî cewab da persanê ANFyî û pare kerd ke seba ke tepişteyî keyeyanê xo ra dûrî ra yenê surgunkerdene hetê ekonomîkî ra zehmetîye ancenê. Aykolî vat: ''Keyeyî seba pêvînayîşî şinê cayanê dûran. No zî seba keyeyan beno barêka girane.''

Huseyîn Aykolî bale ante vayanê kantînê zîndanan ser û vat: ''Gorê qanûnan ganî roje de 3 reyî werd bêro dayene tepişteyan. La hem werd kêm o hem zî çay-qewe, meywe, mast nêdîyenê tepişteyan. Tepişteyî neçare manenê ke tay hewcedarîyanê xo kantînî ra peyda bikerê. Madeyê kantînî zî zaf vay ê. Verî destûr dîyayêne ke tepişteyan tupî bigêrê û xo rê çay ûsn. bikerê. La nika seba çay û girnayîşê awe ceyran lazim o. La ganî tepişteyî pereyê ceyranî bidê. Wextanê peyênan de ceyran zaf bîyo vay. Seke tîcaretxane yo koxûşan rê fatura birîyena.''

Vervatoxê Înîsîyatîfê Paştdayîşê bi Tepişteyan (TDÎ) Hidir Saburî zî ANFyî rê qisey kerd û vist vîrî ke zîndanî sey tîcaretxaneyî hesibîyenê û ard ziwan ke xeylêk keyeyî vaya zêde ra mexdur bîyê. Saburî vat ke vaybîyayîşê ceyranî metodêkê ceza yê vera tepişteyan o.