Tepişteyanê dewaya PKK û PAJKî 27ê teşrîna peyêne ya 2020î de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê xo grevê vêşanîye yo bêagêrayîş û bidor dabi destpêkerdene.

Çalakîya grevê vêşanîye pê koma 49. roja 271. de dewam kena. 14ê temmuze ra nata tepişteyî 15 rojan de yew tewrê çalakîye benê.

Kampa Multecîyan a Mexmûrî de zî grevê vêşanîye yê vera tecrîdkerdişê Rayberê Şarê Kurdî 250 rojî yo yeno caardene. Çalakîye Komeleya Keyeyanê Şehîdan de yena kerdene.

Hetê bînî ra Kampa Lavrioyî ya Yunanîstanî de zî vera tecrîdê Îmraliyî û seba paştdayîşê tepişteyan rayberîya Têgêrayîşê Ciwanan ê Şorişgêran, Têgêrayîşê Cinîyanê Kurdîstanî yê Ewropa (TJK-E) û Merkezê Kulturê Kurdîstanî de 233 rojî yo grevê vêşanîye yeno kerdene.

Grevê vêşanîye yê vera tecrîdê Îmraliyî yê 2012î 68 rojî dewam kerdbi û vengdayîşê Abdullah Ocalanî ser o qedîyabi. Grevê vêşanîye yê 2016î zî roja 8. de pêvînayîşê bi Rayberê Şarê Kurdî ra dima qedîyabi.

Tepişteyan 2018 de rayberîya Hemsereka KCDyî Leyla Guven de 200 rojî grevê vêşanîye kerdbi û grev Hewlêrî ra heta Mexmûrî, Strasbourgî ra heta Gallerî vila bibi.

Semedo ke waştişê înan nêameybî caardene 15 tepişteyan 30ê nîsana 2019î de dest pê rojeyê mergî kerdbi. 10ê gulane de 15 tepişteyê bînî zî tewrê rojeyê mergî bibî.