Tepişteyê Zîndanê Şakranî Erdal Daghan roniştişê dewaya vera ci ra dima raştê gefê kiştişî, nîjadperestî û şîdetê leşkeranê tirkan ame. Daghanî derheqê babete de muracatê Komeleya Huqûqnasan a Seba Azadîye kerd.

Daghanî dîyar kerd ke wextê sewqkerdişê edlîye de ci rê cigêrayîşo rût ameyo ferzkerdene, seba ke o vera ney vejîyayo fermandarê cendirmeyan ê zîndanî hêrişê ci kerdo û o tehdît kerdo.

Daghanî da zanayene ke fermandarê leşkeran ey rê heqaret kerdo, derb kerdo. Daghanî vat: ''Roniştişê dewa ra dima ez şîya nêweşxaneyî la raporê derbkerdişî nêdîya mi. Nêweşxane de leşkeran îşaretê bozkurtî mojna mi, hêrişê mi kerd. Nêweşxaneyî ra verê cû zî leşkerêkî bi kiştişî ez tehdît kerda.''

OHD derheqê babete de muracatê Serdozgerîya Komare ya Riha bikero û gerreyê mesuldaran bikero.