Vizêr serê sibayî rewşa tepişteyê nêweşî Mehmet Emîn Ozkan (Apê Dedo) bîye xirab. Leşkeran destê Ozkanî kelemçe kerdî û bi nê hawayî berz Nêweşxaneyê Perwerdeyî û Cigêrayîşî yê Gazî Yaşargîlî yê Amedî. Dîmenanê nêweşxaneyî de dîyeno ke wextê ardişê Ozkanî de destê ci kelemçekerde yê, nêeşkeno payan ser o vindero.

Keyeyê Ozkanî seba ke nêweşxane de biewnê tira muracatê Serdozgerî û Îdareyê Zîndanî yê Amedî kerd.

Ozkan 25 serrî yo tepişte yo. Heta nila 5 reyan krîzê qelbî derbaz kerdî, 4 reyî anjîyo bîyo. Ozkan de nêweşîyê qelb, tansîyon, guatrî, helîyayîşê esteyan, xirabîya roqleyan estê. Menga gulane ra nata rewşa Ozkanî her ke şino bena giranêr. Ozkan 17,18,19,20 û 25ê gulane de zî wedarîya nêweşxaneyî.