Vengdayîşê Kongreya Neteweyî ya Kurdîstanî (KNK) ser o 15ê gulane de pê beşdarîya xeylêk temsîlkaranê partî, rêxistin û dezgehan zoomî ser o komxebatêke ameye kerdene. Komxebate de tewiro neteweyî yê vera hêriş û îşxalê dewleta tirke ame nîqaşkerdene.

KNKyî derheqê netîceyanê komxebate de pê serrnameyê 'Tewirname' eşkerayîyêke daye. Tewirname de nê çîyî ameyî vatene:

''Dewleta tirke 24ê nîsana 2021î de Başûrê Kurdîstanî de waranê Metîna, Zap, Avaşînî de operasyonêko hîra da destpêkerdene. Nika nê herêman de şerêko giran qewimîyeno. Hêzê gerîlayan bi fedakarî têgêrenê. Nê hêrişî têna vera HPGyî nê vera pêro destkewteyanê Kurdîstanî yê. Armancê nê hêrişan qirkerdişê kurdan o. Dewleta tirke serra 2017î de zî hêrişê Iraqî yê vera Kerkûk, Xurmatû, Xaniqîn, Şingal û qezayanê bînan de paştî daye hukmatê Bexdadî kerde. Dewleta tirke wextê hêrişanê DAÎŞî de zî hemkarîya DAÎŞî kerde. Dewleta tirke Rojawanê Kurdîstanî de îşxalker o.  Başûrê Kurdîstanî de zî tay baregehî ronayî

Nika zî dewleta tirke vera Metîna, Zap, Avaşînî hêrişê pîlî dayî destpêkerdene. Vera nê operasyonê pîlî zaf veng ber nêbi. Ganî na bêvengîye bêra şiknayene. Ma eşkenê oê paştdayîş û yewîye nê hêrişan çin bikerê. Dewleta tirke hende xurt nîya.  Ganî tewirêko neteweyî û niştimanî vejîyo werte.

Heyetê Tewirê Neteweyî yê vera dewleta tirke bi girîngî, lezabezî venga şaranê Kurdîstanî û dinya dano:

-Serrgêra Qirkerdişê Armenîyan de hêrişê vera Başûrê Kurdîstanî mesajê qirkerdişî yê. Ê wazenê kurdan jenosîdî ra derbaz bikerê. Ma do pê pêro îmkananê xo xîret bikerê ke nê hêrişan vindarnê û hetê hêzanê pawitişî de ca bigêrê.

-Bêîtîfaqîya zereyî ya kurdîstanijan pawitişê destkewteyan qels kena. Komxebata ma îtîfaqê zereyî sey şertê esasî qebul kena û seba yewîya neteweyî vengdayîşê xo dibare kena.

-Ganî hêzanê pawitişî rê bi xurtî paştî bêra dayene û seba ney teberê welatî de zî pêvînayîşî karê dîplomasî bêrê kerdene.

-Komxebate vera hêriş û îşxalî venga seferberîya neteweyî û niştimanî pare kena û venga kurdîstanijan dana ke bêmabên çalakîyan bikerê, hêzanê xoverdayoxan têna meverdê. Komxebate venga Serekîye, Parlamento û hukmatê Herêma  Kurdîstanî dana ke wa vera hêrişanê tirkan têbigêrê û hêzanê Tirkîya Başûrî ra vejê.

-Komxebate venga dewleta Iraqî dana ke Tirkîya rê nêrazîbîyayîşê xo bimojno, warê hewayî Tirkîya rê biqefilno.

-Komxebate venga Neteweyanê Yewbîyayeyan, Yewîya Ewropa û pêro hêzanê bînan dana ke wa vera hêrişanê tirkan bêveng nêmanê.

-Komxebate venga dostanê kurdan û rayaumûmîya demokratîke dana ake wa paştî bidê kurdan û nê hêrişan vindarnê.

-Komxebate kurdîstanij û dostanê kurdan ra wazena ke wa ekonomî, mal û turîzmê Tirkîya boykot bikerê.

-Seba xebatêka hempare ya vera hêrişan û caardişê biranê komxebate 'masaya krîzî' do bêra awankerdene.

-Ma vera hêriş û îşxalê dewleta tirke tewir gênê û wayîrê Hêzanê Pawitişî yê Medya vejîyenê. Pawitişê Zap, Metîne û Avaşînî pawitişê pêro Kurdîstanî yo, ma do pê pêro îmkanê xo wayîrê nê xoverdayîşî vejîyê. Ma heman tewir pêro partî, rêxistin, dezgeh û kesayetanê kurdan ra pawenê.''