Tirkîya de meseleyê astengdaran roje bi roje zêdîyenê. Bi wesîleya Roja Astengdaran a Dinya ma waşt ke vengdê înan bidê eşnawitene.

Serkan Çalişkano (32) ke astengdar o û seba ke karêk nêvîneno kuçeyan de ciwîyeno pare kerd ke rewşa ciwan û astengdaran zaf zehmet a. Serkan Çalişkanî derheqê rewşa astengdaran de ANFyî rê qisey kerd. Serkan heta sinifa diyîne ya dibistana verêne wenda û nêeşkeno pê maeşê astengdarîye debara xo bikero coka gêreno kar. Semedo ke dadî û babîyê ci cîya benê Serkan keyeyê xo terikneno û nika zî kuçeyan de ciwîyeno.

Çalişkanî ard ziwan ke sayê taştîya ke embazê ci dano ey eşkeno pîzeyê xo mird bikero. Çalişkanî vat: ''Seba ke vêşan nêmana mi dizdîye kerde. Dima ez tepişîyaya. Ez nêeşkena pereyan qexenç bikera. Semedo ke sabikaya mi esta çew kar nêdano mi.''

Çalişkanî eşkera kerd ke tewr zat wextê qedexeyê tebervejîyayîşî de zehmetîye dîye û polîsan o zaf ecîz kerd. Çalişkanî vat: ''Hewteyê vîyarteyî roja dişemeyî Şîşlî de wexto ke ez kuçe de rakewtêne polîsan ez şîyar kera û hêrişê mi kerd. Polîsan ez berda nêzdîyê Tîyatroyê Harbîye û bi saetan ez zereyê wesayîtî de verdaya. Kuçeyan de asayîşê mi çin o. Ez têna wazena karêk bivîna û keyeyêk de biciwîya. Tirkîya de rewşa astengdar û ciwanan zehmet a. Ma wazenê sey merdiman biciwîyê.''