Dezgehanê komelê sivîlî seba ke binpaykerdişê heqan ê vera Rayberê Şarê Kurdî Abdullah Ocalanî û tepişteyanê bînan yenê kerdene, lezabez bikewê rojdemê Konseya Ewropa muracatêk kerdbi. Tirkîya îdîa kerd ke Îmrali de binpaykerdişê heqan çin o.
Komeleya Huqûqnasanê Seba Azadîye (OHD), Weqfa Cigêrayîşanê Komel û Huqûqî (TOHAV), Komeleya Heqanê Merdiman (ÎHD) û Weqfa Heqanê Merdiman a Tirkîya (TÎHV) semedo ke binpaykerdişê heqanê ke vera Abdullah Ocalanî, Hayatî Kaytan, Emîn Gurban û Ciwan Boltanî yê kerdene cade bikerê rojdemê xo, 29ê temmuze de muracatê Komîteya Wezîran a Konseya Ewropa kerdbi. Tirkîya 7ê êlule de cewab da Mehkemeya Heqanê Merdiman a Ewropa (MHME).
Dezgehanê komelê sivîlî pare kerdbi ke MHME derheqê Abdullah Ocalanî, Hayatî Emîn û Ciwanî de cezaya muebede dîyaye ke na ceza Peymana Heqanê Merdiman a Ewropa binpay kena.
Tirkîya cewabê xo yê 7ê êlule de qala raporê CPTyî yê 16-17ê çeleyê 2013î kerde û îdîa kerd ke Îmrali de verê tepişteyan de têgêrayîşêko xirab nêno kerdene. Tirkîya îdîa kerd ke Îmrali de binpaykerdişê heqanê merdiman çin o la serra 2011î ra nata Abdullah Ocalan têna 5 reyî eşka avûkatanê xo bivîno.
Tirkîya cewabê xo de îfade kerd ke binpaykerdişê heqan 17ê teşrîna peyêne ya 2009î ra verî ameyêne kerdene la ê tarîxî ra nata binpaykerdişêkê heqan nêameyo kerdene.
