Komeleya Huqûqnasanê Seba Azadîye (OHD), Komeleya Heqanê Merdiman (ÎHD), Weqfa Heqanê Merdiman a Tirkîya (TÎHV), Komeleya Komelê Sivîlî yê Sîstemê Înfazê Ceza (CÎSST), Komeleya Huqûqnasan ê Hemdeman (ÇHD) semedê Rayberê Şarê Kurdî Abdullah Ocalan, Omer Hayrî Konar, Hamîlî Yildirim û Veysî Aktaşî yê ke Îmrali de binê terîdî de yenê tepiştene muracatê Komîteya Vergirewtişê Îşkeceyî ya Konseya Ewropa (CPT) kerd.

Muracat de ame vatene ke astenkerdişê pêvînayîşê avûkatan ê bi Ocalan Konar, Yildirim û Aktaşî goreyê huqûqî nîyo û ame vîrfînayene ke Abdullah Ocalanî 7ê tebaxa 2019î ra nata avûtanê xo reyde pêvînayîş nêkerd û Veysî Aktaş, Hamîlî Yildirim û Omer Hayrî Konarî seke sewqê Îmralîyî bîyî serra 2015î ra heta ewro hema rojêke zî avûkatanê xo reyde pêvînayîş nêkerdo.

Raporê CPTyî yê 2019î yê Zîndanê Îmraliyî zî ame vîrardene û nê ameyî vatene: ''Komîteya Şima zî raporo ke 5ê tebaxa 2020î de aşkera kerde de vano ke xeylêk binpaykerdişê heqan estê û ke mekamanê tirkî rê yeno vengdayene ke wa avûkatî û merdimê tepişteyan bieşkê tepişteyan bivînê. Nê çîyê ke raporê şima de ca genê ewro bîyî xirabêr. Badê raporê şima ameyêne pawitene ke Zîndanê Îmraliyî de rewşe bibo hole la herinda nayî de cezaya dîsîplînî dîyayî tepişteyan û qerarê qedexeyanê neweyî ameyî eşkerakerdene.''

Reyna ame vîrardene zîndanan de grevê vêşanîye vera tecrîd û binpaykerdişê heqanê tepişteyan ame kerdene û roja 190ine de qedîya.

Metnê muracatî de ame vîrardene ke CPTyî 1999î ra anta 10 rey Zîndanê Îmraliyî zîyaret kerd û ame vatene: ''Şima zî bi çimanê xo dîyo ke mîyanê 22 serran de şertê înfazî senî giranêr bîyî.  Ma dezgehê huqûq û heqanê merdiman rîyê rejîmê înfazî yê taybetî ra nêeşkenê Îmraliyî zîyaret bikerê.  Ma dezgehê heqanê merdimanê ke îmzayî ma binê nê metnî de estê şima ra wazenê ke seba ke wa raporê şima yê 5ê tebaxa 2020î bêro caardene çi ke hewce keno wa bêro kerdene. Seba ke qedexeyê pêvînayîşê avûkatan ê Îmraliyî bêro wedaritene lezabez têbigêrê.  Zîyaretê şima ra dima di serrî ravêrtî û şertî xirabêr bîyî, coka hewce keno ke şima newe ra Îmraliyî zîyaret bikerê û raporêk amede bikerê.''