Serdestîya Tirkîya hetêk ra şar binê krîzêko giran ê ekonomî de verdayo, hetêk ra zî pereyanê girdan dana çekan.

SIPRI raporê xo de ca da sewîyeya transferê çekan a dinya. Rapor de ame zanayene ke, goreyê serranê 2009-2013'î, serranê 2014-2018 de pêroyê dinya de sewîyeya transferê çekan se ra 7,8 zêde bîya.

Babeta îxracatê çekan de şampîyonê serranê mabênê 2014-2018'î wina yê: DYE, Rûsya, Fransa, Almanya û Çîn. Tirkîya zî bi se ra 170 vêşîbîyayîş lîste de cayê xo rêza 14’ine de girewt. Welatê ke Tirkîya zêdetir çekî rotê ci wina yê; se ra 30 Mîreyîyê Ereban, se ra 23 Tirkmenîstan û se ra 10 Erebîstano Siûdî yo.

Panc welatê ke tewr zêde çekî girewtê zî; Erebîstano Siûdî, Hîndîstan, Misir, Awûstûralya û Cezayîr ê. Tirkîya goreyê demê verî mabênê serranê 2014-2018 de se ra 21 kêmtir çekî herinayê.

Babeta transferê çekan ê globalî de goreyê demê verî mabênê serranê 2014-2018 de, transferê çekan seba Rojakewtena Mîyanêne se ra 87 zêde bîyo. Goreyê raporî, DYE'yî se ra 52 îxracatê xo yê çekan Rojakewtena Mîyanêne rê kerdo.