Roşnvîranê Misirî hêrişê îşxalî yê dewleta tirke yê vera Başûrê Kurdîstanî ANFyî rê ercnayî. Edebîyetkar Suphîr Musayî îfade kerd ke hanî nê hêrişî hêrişanê vera Sûrîye, Iraq, Lîbya û welatanê bînan reyde bêrê ercnayene. Musayî ard ziwan ke Tirkîya bêvengîya warê mîyanneteweyî ra hêz gêna û vat: ''Iraq mîyanê dewletanê ereban de dewleta tewr qels a. Tirkîya ney ra îstîfade kena, hêrişê îşxalî rê dewam kena û bi nê hawayî warê îşxalî hîra kena.''

Serekê Merkezê Cigêrayîşan ê Kurdan ê Misirî û Endamê Meclîsê Karanê Teberî yê Misirî Rejayê Fayedî venga hukmatê Herêma Kurdîstanî û Iraqî da. Fayedî vat: ''Ez nêzanena çira hukmatê Iraq û herêma Kurdîstanî vera nê hêrişan bêveng ê. Ez venga pêro partîyanê Başûrî dana ke wa menfaatanê dewaya Kurdîstanî menfaatanê partîyan ra ver de ronê. Wexto ke Mexmûr yan zî cayê sivîlan dîyenê bombayan ver ez dejîyena. Dewleta tirke hêrişanê vera Başûrî de bi hezaran darî birnayî. Nê darî berdî Tirkîya ke biroşa. No sûcê merdimîye yo.''

Merkezê Cigêrayîşî yê Ehramî ra Dr. Kerem Seîdî zî pare kerd ke Tirkîya seba ke hêzanê mîyanneteweyîyan bianca masaya bazarî hêrişanê îşxalî yê Başûrî rê dewam kena. Seîdî bale ante ser ke Tirkîya xeylêk reyî binê nameyê têkoşînê vera PKKyî de hêrişê Başûrî kerd û waşt ke Rojawan, Başûr û Vakur yewbînan ra cîya bikera.