Binê îqtîdarê AKPyî de Tirkîya de her roje şuxilnayîşê madeyanê kundoxî zêdîyeno. Merkezê Teqîbkerdişê Madeyanê Kundoxî yê Ewropa (EMCDDA) Raporê Awa Gemarine ya Ewropa weşana. Goreyê raporî Tirkîya şuxilnayîşê madeyanê kundoxî de mîyanê panc welatan de vernî de ya.

Goreyê raporî madeya metanfetamînî tewr zaf Îstanbul û Anqara de şuxilîyena. Rapor de pê grafîkan yeno parekerdene ke şuxilnayîşê metanfetamîn Tirkîya, Belçîka, Kibris, Almanya, Spanya, Danîmarka, Fînlandîya, Lîtvanya û Norwêç de zêdîyayo.

2021-2022 de cigêrayîşanê serê awa gemarine de eşkera bi ke Tirkîya de şuxilnayîşê amfetamîn û metanfetamînî mîyanê serran de zêdîyayo.

Reyna mîyanê 60 welatan de mabênê 2021-2022yî de tewr zaf Çekya, Letonya, Almanya û Kibris de şuxilnayîşê metamfetamînî zêdîyayo.