Dayîkanê Şemeyî ra  dayîka Huseyîn Aydemîrî, Asîye Aydemîr dinyaya xo bedilnaye. Huseyîn Aydemîr pîya embazê xo Fehmî Tosunî 19ê teşrîna verên a 1995î de ame destbendkerdene û a roje ra nata tira xebere naêeyî girewtene. Asîye Aydemîr heta hela peyêne semedê caardişê edaletî têkoşîn kerd. Cinîya Fehmî Tosunî, Hanim Tosune qala Dayîke Asîye kerde.

Hanime Tosun vat ê Lîce ra yewbînan sarisnenî û wina dewam kerd: Fehmî û Huseyîn embaz bî. Dima ke înan ser qoricîtîye ameye ferzkerdene Licê ra vejîyayî. Ma Îstanbul de nêzdî ronişenê û yewbînan vînenê. Bado ke Fehmî û Huseyîn ameyî destbendkerdene vistewreyê ci ame cinîya Huseyînî Kiymet berd Amed. Ma 1996 de Îstanbul de Kombîyayîşê Merdimanê Vînîbîyayeyan kerd. Zaf zext bibê la keyeyî ameyî têhet. O wext mi Dayîke Asîye sarisna. Lajê ci têna Huseyîn bi. Dejê ci zaf giran bi. Cara gonî virêtene. Emrê da têkoşînê seba lajê xo. Babîyê Huseyîn Aydemirî zî emser dinyaya xo bedilnaye. Emir înan pê têkoşînî ravîyart. Waştişê ma oyo ke dejo ma ke ma anto wa çewna meanco. Ma pêrune erjîyayeyê xo vînî kerdî, çîyê zaf giran ciwîyayî. La ez zana ke semedê dayîkan no dej dahîna xorî yo. Dejê ewladan yewna qeyde yo. Gama ke ma vejîyenê meydanan ma hem wazenê aqibetê merdimanê xo bimuse, hem wazenê ke çîyê ke ma dîyî wa çewna mevîno. Ewro ra tepîya ez barê Dayîke Asîye zî gena xo ser. Heta nefesê xo yê peyênî ez do têkoşînê aye bidomnê."

Huseyîn Aydemîr Kam o?

Huseyîn Aydemîr 1961 de yeno dinya û dewa Tûtê ya Licê ya Amedî de tîcaretê hewanan keno. Bîlasebeb keyeyê ci tim yeno sereştene. Babîyê ci yeno destbendkerdene û 20 rojî îşkence vîneno. Nezarat de  babîye ci ra vanê, "Lajê xo ra vajê wa bêro teslîm bibo. Nêbo ma do ey ça de tepişê do bimirnê. Ma do meyîtê ci pê panzeri kuçeyan ra kaş bikerê." Badê nê tehdîtan Aydemîr cinî û şeş domananê xo geno şino, Adana û dima ra 1995î de Esenyurtê Îstanbulî de ca dano xo. Aydemîr 19ê teşrîna verên a 1995î de embazê xo Fehmî Tosunî reyde sipare weno û dima ra wird embazî cayanê cîya cîyayan de bi torosanê sipîyan yenê destbendkerdene. Rixmê heme muracatanê keyeyan 28 serrî yo hema zî înan ra xebere nêameye girewtene. Dewaya keyeyanê Aydemîr û Tosunî kirşîyayî Mehkemeya Heqanê Merdiman a Ewropa. 28 serrî yo derheqê aqibetê Aydemîr û Tosunî de qet cipersayîşêk nêame kerdene û dewa seba ke zaf wext ravîyarto ginaye war.