Sîyasetmedara kurde Sebahate Tuncel Zîndanê Sîncanî ra derheqê weçînayîşanê 14ê gulane de ANFyî rê qisey kerd.

Tuncele îfade kerd ke 14ê gulane seba dîyarkerdişê ameyoxê sîyasî, komelkî, ekonomîk û kulturelî zaf girîng o û vat: ''Îqtîdarê AKPyî 20 serrî yo bîyo merkezê krîz, mesele û nakokîyan. Seba ke ma her ca de vera bêedaletîye vajê bes o, seba komelê têdûştî û demokratîkî 14ê gulane de ganî şorê sindoqan ser û raya xo bidê. Îqtîdar ney ma qederê xo tayîn bikerê. Ma weçînayîşanê 14ê gulane de Partîya Çep a Keske reyde erjanê xo awan bikerê. Seba ke ma hesabê qirkerdişan nê îqtîdarî ra bipersê şorê sindoqan ser, seba ke tecrîdê Îmraliyî biqedo ma şorê sindoqan ser.

Partîya Çep a Keske, Îtîfaqê Kede û Azadîye seba azadîya şaran kewtê rayîr. Coka 14ê gulane de seba ke Partîya Çep a Keske armancanê xo bîyara ca û serkêşîya vurîyayîşî bikera ganî bi xurtî bikewa Meclîsî. No Meclîs gaî wezîfeyê meclîsê awankerî bikero. Ez pê bawer kena ke weçînayîşanê 14ê gulane de hem serekkomar do bivurîyo hem zî Partîya Çep a Keske bi xurtî do bikewa Meclîsî.

14ê gulane peynî ya, destpêko newe yo. Hêz, destkewte û moralê ke ma weçînayîşan de do bivisnê destî, îmkan bidê ka ma serkêşîya şaranê Tirkîya bikerê û komara demokratîke awan bikerê. Ez pê bawer a ke her kez bi nê hawayî nêzdîyê weçînayîşan bibo. Ez Îtîfaqê Kede û Azadîye û Partîya Çep a Keske ra serkewtişî wazena.''