Koordînasyonê Weçînayîşî yê Ewropa yê Partîya Çep a Keske seba turê diyînî yê weçînayîşê serekkomarîye eşkerayîyêke daye. Eşkerayîye de dîya zanayene ke Partîya Çep a Keske weçînayîşanê 14ê gulane de bîye partîya hîrêyîne.

Koordînasyonî ard ziwan ke ê do qetî turê diyînî de rejîmê Erdoganî bin bivisnê. Eşkerayîye de wina ame vatene: ''Ma kerd ke turê yewinî de bi şîarê 'Rayêke dîktatorî rijnena' kampanyaya weçînayîşî bikerê. Ma nêverda ke Erdogan û faşîzm 14ê gulane de ser bikewê. Nika zî wextê ci ameyo ke ma faşîzmê Erdoganî teberê welatî de mabênê 20-24ê gulane de bi rayanê xo bin bivisnê.

Ma do seba ke berê ameyoxêkê azad û demokratîkî abibo bixebitê û bi Erdogan û faşîzmî bidê vînîkerdene. Çunke zulm, faşîzm, nîjadperestî, kolonyalîzm rew yan zî erey do bin bikewê.

Coka ma venga pêro kesanê ke demokrasî, huqûq, edalet, azadîye wazenê danê ke şorê sindoqan ser û bi şîarê 'rayêke eşkena dîktatorî birijna' sey milîtananê partîye bixebitê û dormeyê xo zî tewrê xebatan bikerê.''