Hemsereka Pêroyî ya HDPyî Pervîne Buldan û sîyasetmedarê kurdan Ahmet Turk, wekîl û darekarê Partîya Çep a Keske, temsîlkaranê dezgehanê komelê sîvîlî yê Amedî û rîsipîyan reyde ameyî têhet. 

Ahmetî Turkî vat, "Weçînitişî muhîm ê la çîyo tewr muhîm yewîya mabênê kurdan a. Gerek ma kurdî bi heme partî û dezgehanê xo bibê yew. Ma nê ser vindenê. Ewro cografyaya Kurdîstanî de weçînitişî benê. Şarê ma ra pawitişê ma oyo ke wa vera faşîzmî îradeyê xo ramojno. Gerek ma hêzê xo ramojno ke ê mecbûr bimanê ma de dîyalog ronê. Semedê ma kam beno serokkomar mesele na nîya. Eke ma mebê yew ma raştê felakete yenê. Wextê yewbîyayîşî yo. Weçînitişî ra wetêr yew meseleya ma est a. Problem û dejê ma est ê. Ma gerek vera nê zîhnîyetî têkoşînî xurt bikerê. Gerek şarê ma mesajê wayîrvejîyayîşê heq, huqûq û ameyoxê xo bido."

Pervîne Buldan zî nê vat: "Ma vera xîleyanê îqtîdarê AKP-MHPYî hemleya girde kerde. Semedê ma zî hetê zorî yê na hemle bibî la ma semedê şarê xo no alternatîf vîjna. Netîceyê ke ma girewtî çew zî tira razî nêbi. Ma zanê ke eke şertan destûr bidayêne ma zafêr rayî girewtêne. Hedefê ma 100 wekîlî bî la înan heme îmkanê dewlete kerdî dewre û bi xîleyan rayê ma girewtî. Nika verê ma de yewna firset est o. Siba raya ke ma danê beno ke qederê ma bidedilno. Ma nêvanê serokkomaro bîn do cadê problemanê ma çareser bikero la ma eşkenê warê demokratîkî înşa bikerê ke sere de meseleya kurdan meseleyê bînî tede bêrê çareserkerdene. Vîjnayîşê Erdoganî semedê kurdan do bibo felakete newî. Gerek mabênê roşnî û tarîtîye, demokrasî û faşîzm û haştîye û şerî de yew qerar bêro dayene. Gerek şarê ma siba şiro sindoqan ser û Amedî ra mesajêkê xurtî bido Anqara."