Turkdogan: CPT gureyê xo nêkeno, KE polîtîk têgêrena

Serekê pêroyî yê ÎHDyî Turkdoganî vat ke tecrîdê Îmraliyî hindî agêrayo bi îşkenceyî, CPT gureyê xo nêkeno û Konseya Ewropa zî binpaykerdişanê heqan ê ûcayî rê bi hawayêkê sîyasîyî nizd bena.

Ma derheqê meseleyanê tecrîdo girankerde yê serê Rayberê Şarê Kurdî Abdullah Ocalanî, grevanê vêşanîyan ê ke seba paştîdayîşê çalakîya grevê vêşanîye yê Leyla Guvene ameyê destpêkerdene, polîtîkayê teberî yê dewleta Tirkî û nizdbîyayîşê Rojawanî ser o serekê pêroyî yê Komela Heqanê Merdiman Ozturk Turkdoganî dir qisey kerd.

‘TECRÎD HEMEYÊ CIMATÎ SER O YENO BICAARDENE’

Derheqê tecrîdî de Turkdoganî nê vatî: “Tecrîdê serê Ocalanî heman wextî de vînayîş û fikranê ê ser o zî yeno bicaardene. Wazenê ke vernîya vilabîyayîşê fikranê ê bigîrê. Gama ke tecrîd kesêk ke hende cehdê aşitî keno ser o bêro bicaardene, no tecrîd heman wextî de serê hemeyê cimatî de zî yeno bicaardene. Yanî temamê cimatî ser o tecrîd yeno bicaardene.

Hemverê nê tecrîdî de zî cimatî mîyan de reaksîyonêk esto, cimat çalakîya Leyla Guvene rê wayîr vejêno. Hetêna ra yeno waştene ke no hesasîyetê cimatî bi zext û zordarîyan bêro şiktene. Sazîya CPTyî ya Konseya Ewropa hendî tayê çîyan dana têro. Helbet Tirkîye meseleyê tecrîdî de CPTyî rê tayê çîyî vatê. Labelê CPT çîyo ke aye ra vajîyayê nê ganî gureyê xo bica biyaro, halî cayê ci de tesbît bikero û bi eşkerayî biyaro ziwan ke heqê Ocalanî yenê binpaykerdene. Gureyê CPTyî vernîgirewtişê îşkenceyî yo. Eke CPT herinda vernîgirewtişî de bi bêxemî têgêrena no yeno na mana ke gureyê xo bica nêana.

Ma tîya vînenê ke kêmasî Konseya Ewropa de zî esta. Konseye eşkena hemverê binpaykerdişanê Tirkîye de hîna aktîf têbigêro la însîyatîfêkê winayênê nêgêna. Mesela Kurdî ewro cayê ke ciwîyenê ê cayan de wazenê ke îdareyanê xo awan bikerê. Yanî wazenê ke heqê xo yê tewrbîyayîşê îdareyî bixebetnê. Eke Konseya Ewropa goreyê peymannameyanê xo têbigêrayêne ganî paştî bidayêne nê heqê Kurdan, la wina aseno ke Konseye bicaardişê wezîfeyanê xo ra dûrî kewta.”   

 ‘KONSEYA EWROPA PABESTEYÊ NIZDBÎYAYÎŞANÊ DEWLETAN A’

Turkdoganî dewamê qiseykerdişê xo de nê vatî: “Tawîzê ke heta ewro ameyê dayene nê welatan de hetê heqanê merdiman û demokrasî ra faydeyêk nêresna, eksê nê de nê wareyan de problemî hîna bî gird. Na polîtîkaya Konseye bi îflasî qedîyaye. Nika Rûsya vejîyayîşê endamîya Konseya Ewropa ser o munaqeşeyan kena.

Ganî nizdbîyayîşê dewlete û yê Konseye yewbînan ra cîya bibê. Konseye gureyo ke seba aye ameyo bewlîkerdene ganî bica biyaro. Ma vînenê tawîzê ke dîyayî bi Tirkîye çîyêkê rindî nêard meydan, Tirkîye hîna ver bi xirabî ser berde.” 

GEFÊ ERDOGANÎ TENYA BI VÎJNAYÎŞAN ELEQEDAR NÊYÊ

Sereko pêroyî yê ÎHDyî Turkdoganî peynîya qiseykerdişê xo de zextanê Tirkîye ser o vindert û nê vatî: “Dimayo ke serra 2015 ra tepîya reyna pêkewtişî dest pêkerdî Tirkîye bi hawayêkê eşkerayî vat ke aye nêwazena Kurdî Sûrîye de bibê wayîrê statu. No zî eşkera yo ke polîtîkaya şerî dewre de ya. La wextê hêriş û pêkewtişan goreyê vîjnayîşan yeno tayînkerdene. Bi nê hawayî wazenê ke destekê dormeyanê muhafezekar û neteweperweran hîna bikerê zaf.

Tirkîye dewletanê tewr bihêzan ê Rojakewtena mîyanene ra ya ke îtîfaqê Rojawanî de ya. Na yewe ra aşitîya zereyê Tirkîye welatanê dormeyan rê zî tesîr kena. Aşitîya Tirkîye do Rojakewtena mîyanêne rê zî huzûr biyaro. Hetêna ra zî meseleyê Kurdistanî meseleyêk ke tenya Tirkîye, Îran, Iraq û Sûrîye dir eleqedar bo ra vejîyayo. Hendî xeylî peymannameyan, paktan û sazîyanê mîyanneteweyîyan dir zî eleqedar o.

Hetê Têgêrayîşê Kurdan ra ramojîyayîşê Ocalanî sey muhatab zaf muhîm o. Eke ewro persa çira gama mesele beno Ocalan peymannameyê mîyanneteweyîyî nênê bicaardene bêro kerdene tam zî cewabê ci tîya de yo. Eke dewletî babeta halkerdişê meseleyê Kurdan de samîmî bibîyêne ewro Îmrali de tecrîd çinêbîyêne.”