Hemserekê Pêroyî yê Komeleya Heqanê Merdiman (ÎHD) Ozurk Turkdoganî pîya bi rêxistinanê komelê sîvîlî semedê Rayberê Şarê Kurdî Abdullah Ocalan, Omer Hayrî Konar, Hamîlî Yildirim û Veysî Aktaşî yê ke Îmrali de binê terîdî de yenê tepiştene, seba ke qerarê Mehkemeya Heqanê Merdiman a Ewropa (MHME) bêro caardene muracatê Komîteya Wezîran a Konseya Ewropa kerd.Turkdoganî derheqê babete de ANFyî rê qisey kerd.

Turkdoganî vat: ''MHME xeylêk qeraranê xo de û çar qeraranê derheqê Tirkîya de kesanê ke cezaya muebbedî girewta, îfazê înan heta mergî qebul nêkena. Madeyê 3. yê pêkerdişî de yeno vatene ke ganî miheqeq yew demo ke merdimî yenê veradayene bidîyo înan. La Tirkîya hema zî no qerar nêard ca.  Ma zî sey rêxistinanê komelê sîvîlî seba ke qerarê MHME bêro caardene muracatê Konseya Wezîran kerd. Tirkîya cewabêk da nê muracatê ma. Cewab de zafêr şertê Îmraliyî û cipersayîşê Komîteya Vergirewtişê Îşkeceyî ya Konseya Ewropa (CPT) ameyî destgirewtene. Derheqê babeta esasîye de cewabêk çîn o. Ganî mevzuatê derheqê kesanê ke cezaya muebbedê giranî girewta bêro bedilnayene. Komîteya Wezîran na babete girewta rojdemê xo û do naye ser o vinder o.''

Turkdoganî dewayê Selahhattîn Demîrtaş û Osman Kavala vist vîrî û vat: ''Qerarê Daîreyê Pîlî nêameyî caardene. Nika heta 30ê teşrîna peyêne wext ame dayene û waştene ke wa Demîrtaş û Kavala cade bêrê veradayene. Eke Tirkîya naye nêro ca  o wext prosedurê îxalî kewno dewre. Endamîya Tirkîya ya Konseya Ewropa yena vindarneyene. Xora netîceyê naye hem sîyasî hem zî ekonomîk estê.''

Turkdoganî ard ziwan ke ganî Tirkîya dewro tewr kilm de problemê rejîmê înfazî çareser bikero û nê vatî: ''Beno ke semedê Ocalan, Kaytan, Boltan û Gurbanî zî demê verê ma de qeraro winayên bêro girewtene. Tirkîya xora binê kontrolê sîyasîyî de ya. Tirkîya berpirsîyaranê xo yê Konseya Ewropa nêana ca. Ma wazenê ke wa nê bêrê caardene. Nê waştişî têna çar kesan eleqedar nêkenê. Nika Tirkîya de bi hezaran kesan cezaya muebbedê giranî girewta û aqibetê înan bewlî nîyo. Na rewşêka giran a. Ganî Tirkîya cade rejîmê înfazî bikerê rojdemê xo çareser bikero.''

Turkdoganî vist vîrî ke Abdullah Ocalan, Hayatî Kaytan, Emîn Gurban û Civan Boltan xeylêk wexto avûkat û merdimanê xo nêeşenê bivînî û vat: ''Ma xeylêk rey Wezîrîya Edaletî rê muracat kerd. Tirkîya de xora dezgehê ke Zîndanê Îmraliyî zîyaret bikerî estê la destûrê înan nêdîyeno. Bi îdîayanê cezaya dîsîplînî destûrê pêvanayîşan nêdîyeno. Tirkîya de raşta zî caardişê ke zor danê sînorê huqûqî estê ke qebulkerdişê înan mumkin nîyo. Eke Abdullah Ocalan û Îmrali bbbê babete dezgehê hukmî giran têgêrenê. Semedê yew tepişteyî pêvînayîş tewr tay hende azadîya îfadeyî  heqêko biqiymet o. No heq ganî bêro teslîmkerdene.''