Mele Mûtafa Tûzako ke semedê wedartişê tecrîdê serê Rayberê Şarê Kurdî Abadullah Ocalanî Berlîn de pîya bi 3 aktîvîstan tewrê xoverdayîşê grevê vêşanîye bibi Bochum de reyna gêrîya binê tedawîye.

Vera tecrîdê Îmrali paytextê Almanya Berlîn de 4 aktîvîstê Kurdî Omer Bagdûr, Cemal Kobanê, Şîyar Xelîl û Mele Mûstafa Tûzak yê ke grevê vêşanîye de bî, bi vengdayîşê Ocalanî 26’ê Gulane de çalakîya xo qedînayebî.

Tûzako ke çalakîya xo 134 rojî daye domnayene rîyê îxmalkarîya  wezîfedaranê weşîye ra rojêk cuwa pê nêweşxane de ame tedawîkerdene. Tûzako ke vizêr nêweşxane ra ame vetene şi Duîsburg cayo ke tede ciwîyeno. Tûzak bi heskerdişê Kurdistanijan ame pêşwazîkerdene. Tûzako ke saetanê şanî de şi Bochum ûca reyna rewşa weşîya ci xirab bîye û ame berndene bi nêweşxane. Ame vatene ke Tûzako ke rîyê grevî ra bîyo 44 kîlo, qeseba sîyaye ya ci de kîst esto û ganî demêk nêweşxane de bimano.