Vervatoxa Partîya Çep a Keske Çîgdeme Kiliçgun Uçar badê weçînitişî kombîyayîşê verênî yê partîya xo yê meclîsî de derheqê rojdemî de qisey kerd.

Uçare ard ziwan ke netîceyê weçînitişî semedê her kesî zaf mûhîm ê û vat, "Wa çew mevajo qey ma têkoşînê xo caverdêne. Netîceyê weçînitişî senî benê wa bibê, heta ke meselaya kurdan nêro çareserkerdene, qet îqtîdarêk nêeşkeno payra bimano. Coka îdarekarê welatî gerek na raştîye bivînê û goreyê ci pzîsyon bîgêrê. Badê weçînitişî krîzî dahîna xorî bîyî, her hetî ra rewşe xirabêre bena.

Ma weçînitişî ra dima dest pê kombîyayîşan kerd. Ma soz da şarê xo ke ma do bi rexne û xorexnekerdişî dest pê newe ra înşakerdişî bikerê. Meseleya esasî faşîzmo ke verê ma de yo. Ma do vera faşîzmî têkoşînî xurt bikerê. Êyê ke wazenê partîya ma bikerê bêhêz wa bizanê ke tîya ra tiway înan dest nêkewno. Heta ewro çew nêeşka ma rayîrê raştî ra raqilno, do ewro ra tepîya zî wina bo. 

Partîya ma têna partîya weçînitişî nîya, partîya ma partîya şarî ya. Hêzê xo şarî ra gena, coka şima nêeşkenê verê ci bîgêrê. Nê prosesî de munaqeşeyê ke yenê kerdene do paradîgmaya ma xurtêr bikerê. Ez reyna vajî, têna muxalefet û hêzo ke komelî paweno ma yê. Ma do sey fînalî kongreya xo bikerê. Ma do pîya bi şarê xo bi kongreya girde ramojnê ke sîyaseto demokratîk senî yeno kerdene. Sernameyanê tew muhîman ê kongreya ma ra yew Rayîrê Hîrêyin o ke game bi game, gave bi gave yeno muntene. 

Semedê destpêkerdişêkê neweyî gerek ma îtîfaqê xo yê komelkî  û îtîfaqê xo yê demokrasîyî xurtêr bikerê û tekîlîya xo bi her hetî şarî hêzdar bikerê. Ma do pîya bi şarî kuçeyan de wayîrê heqanê xo bivejîyê. Seba ke ma krîzanê hukmatî ra bivejîyê, hewcedarîya Rayîrê Hîrêyinî est a. Ma berpirsîyarîya xo zanê. Ma do destûr medê îqtîdarî ke welatî dahîna zaf kaş bikero mîyanê sefaletî. Ma do miheqeq ser bikewê."