Endama Komîteya Merkezî ya PKKyî Hêlîne Umît Medya Haber TV de rojdem ercna.

Qiseykerdişê Hêlîne Umît ra tay noqtayê girîngî wina yê:

''28 mengî yo ma Rayber Apoyî ra xeberêke nêgênê. Seba ke raştîya dewleta tirke bêra famkerdene ganî tecrîdê Îmraliyî bêro famkerdene. Polîtîkayê qirkerdişî Îmrali de yenê dîyarkerdene. Dewleta tirke rejîmêkê qirkerdişî yo. Hêzê mîyanneteweyî zî pê bêvengîya xo paştî danê nê rejîmî û sîstemê Îmraliyî. La reyna zî ganî ma warê mîyanneteweyî de seba azadîya Rayber Apoyî têkoşînî pîlêr bikerê. Xora oyo esas têkoşînê ma yo. Dewleta tirke kerd ke pê tecrîdî têgêrayîşê ma tasfîye bikera, Rayber Apoyî bigêra binê kontrolê xo. La xoverdayîşê Îmraliyî yê Rayber Apoyî nê armancî pûç kerdî. Ewro sîstemê Îmraliyî nêno nimnayene. Biewnê wextê peyênî de rojnameger Merdan Yanardag seba ke nê sîstemî ser o qisey kerd tepişîya. 

Reyna îqtîdar zî muxalefet zî Rayberîye ser o sîyaset kenê. Muxalefet wazeno ke kurdan bainco kişta xo, vano ke ê dûştê îqtîdarî yê. La eke babete bêra meseleya kurdan û estbîyayîş û azadîya kurdan ser muxalefet AKPyî ra hîna xirab pozîsyon gêno. Tirkîya de teyna îqtîdar ney muxalefet zî polîtîkayanê şerê taybetî ano ca. Muxalefet teyna dûştê AKP-MHPyî yo la kişta sîstemî de cagêno. Muxalefet nêeşkeno bi dûştîya AKP-MHPyî kurdan bixapîno.

Ez şexsê embaze Zîlane de pêro şehîdanê menga hezîrane û şehîdanê şorişî bi rêzî yad kena. Menga hezîrane de gerîlayan çalakîyê bitesîrî kerdî. Heyf ke tay şehadetî zî qewimîyayî. Şehîdê ma raştîyê ma yê û îsbatê têkoşînê hemparî yê. Hezîrane de embaze Asya û embaz Koçer şehîd bîyî. Asya Dengizê Reşî ra bîye. Embaz Koçer zî alman bi. Nê şehîdê ma îsbat kenê ke ma do senî neteweya demokratîke û cuya hempare awan bikerê. Nê şehîdê ma xeta nîjadperestîye zî pûç kenê.

Ewro dewleta tirke her ca de hêrişê kurdan kena. Tewr peyên wexto ke Mesrûr Barzanî şi Tirkîya embazê ma ameyî qirkerdene. Nê xora çîyê tesadufî nîyê. PDK pê têgêrayîşê xo paştî dano dewleta tirke û hêrişanê ci keno meşrû. Dewleta tirke Rojawan de zî bi destûr û teşwîqê Rûsya û Îranî hêrişanê xo zêdînena. Embazê ma Yûsra Derwêş, Leymane Şiwêş û Firat Tuma Qamişlo de hetê dewleta tirke ra ameyî qirkerdene. Dewleta tirke Rojawan de qestî ra cinîyan ê serkêşan kena hedef ke îradeyê şarî bişikna. Dewleta tirke bi ferasetê DAÎŞî têgêrena û wazena Rojawan de ferasetê DAÎŞî serdest biba. 

Embaze Zîlane 27 serrî verî çalakîya xo ya fedayîye kerde û raştîya Rayberîye mojnaye her kesî. Wexto ke embaze Zîlane na çalakîye kerdbî ez hetê Rayberîye de bîya. Rayber Apoyî ma rê çalakîya aye ercnabî. Rayber Apoyî seba aye vat 'Zîlane fermandara min a.' Embaze Zîlane Rayberîye heta çeperê xo hîs kerde. Ma zî aye wina hîs kenê û fam kenê. Embaze Zîlane ruhê PKKyî bîye. 

Ez qurbananê Qirkerdişê Madimakî bi rêzî yad kena. Ê şehîdê demokrasî yê. Dewleta tirke osmanîyan ra nata elewîyan qetil kena û kena ke sentezê Tirk-Îslamî awan bikera. Rayberîya ma tim giranîye daye rêxistinîya elewîyan û Dêrsimî. PKK seba qesasê Terteleyê Dêrsimî zî ronîya. Qirkerdişê Madimakî seba ke têgêrayîşê kurdan û tirkan nêzdîyê yewbînan nêbê ame kerdene. Ewro hema zî elewîyan ser o tehlukeyê qirkerdişî est o. Seba ke Qirkerdişê Madimalî reyna nêro kerdene û seba ke elewîyî bi nasname û bawerîya xo biciwîyê ganî Tirkîya de sîyasetê rayîrê hîrêyînî bêro awankerdene. Elewîyî zî ganî bi hawayêkê rêxistinkerdeyî mîyanê ney de cabigêrê.

PKK teyna yew rêxistinîya çekdare nîyo; PKK yew fikr o. PKKyî Kurdîstan de ronesansêk viraşt û aver berd. Seke Rayberîya ma vatbi îşkence û hêrişanê Darbeya 12ê Êlule ra nêbîyêne beno ke PKK tim sey yew têgêrayîşê fikran bimendêne. Şert û mercan kerd ke PKK dest bierzo çeke. PKK coka yew hêzê kurdan ê sîyasî yo. Êyê ke na raştîye qebul nêkenê raştîya kurdan û Kurdîstanî zî qebul nêkenê. PKKyî weçînayîşan de zî rayîro hîrêyîn pawit. Êyê ke nê tewirê PKKyî ra qayîl nîyê  objektîf nîyê.

Ewro Hîzbullah, PDK, HUDA PAR û terefgîrê PDKyî pêro kurdan û waştişanê kurdan ser o qisey kenê. La eke PKK qisey bikero ney ra aciz benê. Çunke ê samîmî nîyê û kurdayetîye roşenê. Şarê ma ganî goş nêkuwo nînan. PKK şar o. Ma ney şarê ma wina vano. Çew nêeşkeno raştîya PKKyî zerrîya kurdan ra biqerifno. Dewlete bi xo çend serrî yo seba ney xîret kena la pê nêeşkena. Çunke şarê ma hetê PKKyî de yo. Şarê ma xeta şehîdan de, dormeyê raştîya PKKyî de, roşnîya Rayber Apoyî de xoverdayîş keno û do bikero.''