Endama Komîteya Merkezî ya PKKyî Hêlîne Umît Medya Haber TV de rojdem ercna.

Qiseykerdişê Hêlîne Umît ra tay noqtayê girîngî wina yê:

''Ma eşnawit ke reyna cezaya qedexeyê pêvînayîşan a 6 mengan dîyaya Rayber Apoyî. Nê cezayê sîstematîkî çarçewa konseptê tecrîdî de dîyenê. 2015 ra dima çarçewa Planê Çokdayîşî de tecrîdê Îmraliyî ame girankerdene. La bi taybetî weçînayîşanê 14-28ê gulane de ma dî ke Rayber Apo merkezê sîyasetê Tirkîya yo. Pêro nîqaşî ey ser o yenê kerdene. La ganî nê nîqaşan de heqê ey ê cewabî zî bibo. Dewleta tirke fikr û tesîranê Rayber Apoyî ra tersena. Coka nê sîstemê tecrîdî rê dewam kena. Ganî pêro hêzê demokratîk-şorişgêrî û kurdî seba şiknayîşê tecrîdî û azadîya Rayber Apoyî têkoşînî berzêr bikerê. 

Ma wextê erdlerzê 6ê sibate de bira çalakînêkerdişî dabî û vera provakasyonanê AKP-MHPyî heta weçînayîşan bira çalakînêkerdişî arde ca. La dewlete reyna nêvinderte û bi giranî hêriş kerd. Bîlançoya şerê gulane ya HPGyî de zî dîyeno ke tay embazê ma hêrişanê winayênan de şehîd bîyî. A raşte ma zanenê ke pozîsyonê ma yê pawitişî de zî artêşa tirke hêriş bikera. Aseno şer do giran bibo. La amadekarîyê ma tam ê. 

Seke zanîyeno ma serrgêra Hemleya 1ê Hezîrane ya 2004î de ya. Hemleya 1ê Hezîrane vera xeta tasfîyekere dîyabî destpêkerdene. Hemleya 1ê Hezîrane morê xo da binê nê 20 serran. Hemleya 1ê Hezîrane wextê hêrişanê giranan ê vera kurdan û xîretanê tasfîyekerdişî de vurîyaye raştîya şarê ma. Hemleya 1ê Hezîrane mojna ke çew nêeşkeno PKKyî biqedîno û tesîrê Rayber Apoyî bikêmîno.

Dewleta tirke vera Kampa Mexmûrî peyê planan de ya û artêşa Iraqî zî kena şirîka nê planan. Şarê Mexmûrî vera xîretê ablûqakerdişî yê Iraqî tewirêko xurt mojna. Şarê Mexmûrî şarê Botanî yo û heta nika nê şarî fedakarîyê pîlî kerdî. Zerarê nê şarî çewî rê çin o. La dewleta Iraqî waştişê Tirkîya ser o Mexmûrî rê teda kena. Ganî şarê kurdî her ca de vera xîretanê winayênan payan ser de bibo û şarê Mexmûrî teyna nêverdo. Reyna PDK zî keno ke Mexmûrî sey tehlukeyêkî bimojno. PDK xeta xayînîye de têgêreno. PDKyî ra nêbîyayêne dewleta tirke hende bi barbarî nêeşkayêne hêrişê kurdan bikera. PDKyî zemînê hêrişanê vera Mexmûrî akerd.

Komara Tirkîya ha prosesê vurîyayîşêkê cidîyî de a. Ma eşkenê ney rê vajê 'prosesê şorişê demokratîkî.' Ma weçînayîşê gulane zî sey parçeyê nê prosesî dîyî û giranîye daye ci. Weçînayîşan mojna ke Tirkîya de di terefî est ê; terefo dewletperest û terefo azadîgîr. Weçînayîşan de eşkera bi ke partîyê Îtîfaqê Miletî muxalîf ney dewletperest ê. Çunke netîceyê weçînayîşan meşrû nêbîyê la înan cade netîceyî qebul kerdî. 

Vakurê Kurdîstanî de wextê weçînayîşan de zî polîtîkayê şerê taybetî û operasyonê vera HDPyî zaf qewimîyayî. Coka ganî çew HDPyî bi hawayêkê neheqî rexne nêkero. A raşte weçînayîşan de HDP nê partîyê resmî bin kewtê. 

Wezîrê Karanê Zereyî Suleyman Soyluyî bi fekê xo îtîraf kerd ke ê do HUDA-PARî sey hacetêkê weçînayîşî şuxilnenê. Dewlete kena ke HUDA-PARî ra yew 'Hamasê Kurdan' awan bikera. HUDA Par dewamê Hîzbullahî yo ke vera têgêrayîşê kurdan ameyo awankerdene. 

Xoverdayîşê Gezî, Şorişê Rojawanî, Xoverdayîşê Kobanê. Nê pêro heman wextî de qewimîyayî. Nê serebûtan mojna ke şarê Tirkîya eke firsend bivînê do cade bivurnê. Tirkîya hewceyê vurîyayîşêkê cidîyî ya. Ganî çew hêvîya xo ra fek vera nêdo.Hêzê vurîyayîşî fitratê her merdimî/e de est o coka ganî her kes xo ra dest pêbikero. Ma sey welatî û şaran wayîrê ê potansîyel ê ke Tirkîya bi hawayêkê demokratîkî bivurnê. Coka wa her kes her ca de prosesê têkoşînî awan bikero û tewrê têkoşînî bibo.''