Hemvervatoxê Masaya Îslamî Zahît Mutluyî ANFyî rê qisey kerd û da zanayene ke AKP-MHP Îslamî seba menfaetanê xo şuxilneno. 

Mutluyî vist vîrî ke seba manîpulekerdişê komelan dîn argumanêko xurt o û vat: ''Dewrê qesre û îqtîdarîye wextê Enemîyan de dest pêkerdo. Wexto ke Yezîdî Hz. Huseyîn û keyeyê ci qetil kerd seba ke verê nêrazîbîyayîşê şarî bigêro hadîsê 'Leşkerê ke vera Bizansî şer kenê û Konstantîn fetih kenê çi fîraz ê' aferna. Yezîdî bi nê hawayî bala misilmanan vurnaye. Reyna Hz. Ebû Hanîfe seba ke vera îqtîdarê Abbasîyan vejîya ame qetilkerdene. Na hişmendîya ke dana peyê qesre û îqtîdarîyee ferasetê Îslamî rê nêşinê. AKP û şirîkê ci ewro tradîsyonê Emewî û Abbasîyan teqîb kenê. AKP seba pawitişê îqtîdar û qesra xo Îslamî sey malzemeye propaganda şuxilneno û keno ke pê dînî şarî kontrol bikero.''

Mutluyî bale ante ser ke hişmendîya Tirk-Îslamî dişmenîya vera kurdan kena la Îslam nîjadperestîye red keno. Mutluyî vat: ''Eke ma bala xo bidê Quran-i Kerîm û Hz. Muhammedî ser ma ney bi zelalî fam kenê. Quran vano ke 'Mi milîtî cîya-cîya afernayê ke şima yewbînan bişinasnê.' Reyna ayetê Quranî qala ziwananê cîyayan kenê. Wexto ke ma ewnîyenê raştîya AKP-MHPyî ra, vînenê ke ê seba ke sîyasetê xo yê gemarinî rê dewam bikerê dînî şuxilnenê. Yew eleqeyê AKPyî bi Îslamî çin o.''