Karkeranê rotişgeh û marketan 2020 de mîyanê Sendîkaya Karkeranê Rotişgeh û Marketan (Magaza-Market-Sen) de dest pê rêxistinbîyayîşî kerd. Îdarekarê Magaza-Market-Senî Nebîl Sarikayayî derheqê meseleyanê karkeran de ANFyî rê qisey kerd.

Sarikayayî îfade kerd ke seba ke vengê karkeran berz bibê înan sendîkaya xo awan kerda û vat: ''Hûmarê rêzê marketan zêdîyena. Ma bi ronayîşê sendîka armanc kerd ke vera neheqîya serê karker û kedkaran têkoşînêkê rêxistinkerdeyî bikerê. Seba karkeranê marketan û rotişgehan pênaseyêk çin o. Coka pakîkerdişî ra heta cakerdişê malzemeyan her karî pê nê karkeran dîyenê kerdene. Karkerî bi hawayêkê zêdeyêrî dîyenê xebitnayene û heqê nînan nêno dayene.''

Sarikayayî ard ziwan ke sîstemê karkeran sîstemêkê koletîye yo, heqê înan ê ciwîyayîşî yan zî ê pawitişî çin o. Sarikayayî vat: ''Ma xîret kenê ke têkoşînê rêxistinîye yê karkeranê marketan pîl bikerê. Par pêrar karkeranê marketanê ŞOKî meaşo kêm qebul nêkerdbi û mîyanê sendîkaya ma de xo rêxistin kerdbî. Netîceya têkoşînî de patronan apey game eşte û meaş zêdîna.''

Sarikayayî oare kerd ke hem marketan hem zî rotişgehan de mesele hempar a, têkoşînê vera nê meseleyan zî ganî hempar bibo. Sarikayayî vat: ''Ma venga pêro karketanê market û rotişgehan danê ke wa bibê endamê Magaza-Market-Senî. Ma do pîya têkoşînê xo pîlêr bikerê. Ma do nê sîstemê kolonyalîstî pîya bivurnê.''