Komeleya Kultur, Hetkarî û Averberdişî ya Gêxî, Dep, Azarpêrt, Xorxol û Çêrme (KAYY-DER) 17ê êlule de qezaya Beykozî ya Îstanbulî de Festîvala Boreka Kurdan a 6ine kerde. 

Nameyê boreka kurdan Darbeya 12ê Êlule ra dima amebi kerdene 'boreka kutî.' Festîvale de vera ney nêrazîbîyayîş ame mojnayene.  

Hemsereka KAYY DERî û beşdaranê festîvale derheqê babete de Ajansê Mezopotamya rê qisey kerd. 

Hemsereka KAYY DERî Bîlsene Ozdogan da zanayene ke mucîdê boreka kurdan kesê bi nameyê Mehmed Efendî yo ke dewa Bîlîce ya Çewlîgî ra yo. Ozdogane vat: ''Mehmet Efendî sey 'Rengo Mehmet' şinasîyayêne. Boreka kurdan serranê 1980an ra naya yena viraştene. Dima na bireke sey 'boreka kutî', 'boreka hemalan' ameye namekerdene. Ma vera ney sey komele tewir girewt. Ma 2018 de patentê nameyê boreka kurdan girewt. Hema zî xîret yeno kerdene ke nameyê 'boreka kurdan' bêro kerdene boraka kutî. Seba ke nameyê boreke nêvurîyo ma têkoşîn kenê.''

Beşdaranê festîvale ra Hedîye Arda bale ante ser ke ganî domanî ziwanê xo yê dayîke bimusê û vat: ''Ma seba kulturê xo ameyî nna festîvale. Tay kurdî eslê xo înkar kenê. Wa kurdî raştîya xo bizanê, ziwanê xo bizanê.'' 

Zeynepe Kuloglu vat: ''Ma her serre tewrê na festîvale benê. Ma kenê ke kultur û tradîsyonanê xo bipawê. Xora mesele teyna boreka kurdan nîya. Ziwanê ma, kulturê ma û hûrmetê bi cinîyan seba ma girîng ê. Ma est ê û do tim est bê. Ziwanê ma yê dayîke nasnameyê ma yo.''