Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 354 rojî yo verê Edlîyeya Riha de nobeta edaletî de ya.

Nobeta ewroyîne de keye musa ke vera Emîne Şenyaşar 14. bi îdîaya ''heqaretî'' tehqîqat ame akerdene.

14ê hezîrana 2018î de ambulansê birîndaranê keyeyê Şenyaşarî maruzê hêrişî mendbi. Ferît Şenyaşarî fotografê hêrişî mojna û vat: ''Nêweşxane de sûcê merdimîye ame kerdene. Nê sûcdarî hema zî mîyanê şarî de yê. Şer de zî merdim nêeşkeno hêrişê ambulansan, nêweşxaneyan bikero. La keyeyê Yildizî nêweşxane de qirkerdişêk kerd.''

Ferît Şenyaşarî fotografê vilakerdişê medyaya dîjîtale yê doktorê nêweşxaneyî mojna ke vilakerdiş de wina nuştêne: ''Nêweşxane de qirkerdiş ame kerdene û doktoran rê gef ame wendene. Wezîrîyê Karanê Zereyî û Edaletî wa bêveng nêmanê, wezîfeyê xo bikerê.''

Ferît Şenyaşarî da zanayene ke bi bahaneya ke Yildizî rê heqaret kerdo vera ye tehqîqat ame akerdene û vat: ''Wa keyeyê Yildizî bi kostumê xo yê wekîlîye vajo ke înan senî qirkerdiş kerdo. Heta ke edalet bêro ma do verê edlîye ra nêşorê. Vizêr reyna venga dadîya mi dîya ke asayîş de îfade biba. No bîyo tehqîqato 14in. Ê seke dadîya mi rêxistina sûcî ya ewnîyenê aye ra.''