Esat Atabay û keyeyê ci mengêke û nême ra verî Cizîre ra şîyî Kocaelî û baxçeyê Selîm Çubukê faşîstî de xebitîyayêne. Çubukî ekîbêka bîne cayêkê duzî de xebitnayêne la keyeyê Atabayî seba ke kurdê kendalî de xebitnayêne. Atabayî vera ney nêrazîbîyayîşê xo mojna. Çubukî karî ra dima Atabey herinda ke Kocaelî de verdo taxa Hizirî de verda û keyeyê Atabayî nêçare mend ke bi saetan peya şorê keyeyê xo.

Çubukî heqê Atabayî hezar û 750 lîra nêda û keye mexdûr kerd. Atabayî Çubukî rê telefon kerd û ci rê vat ke eke o heqê ci nêdo xebere bido polîsan. Çubukî naye ser o Atabayî rê gef wend û vat: ''Ti zanenî ez kam a. Ez nêverdena ti uca ra vejîye. Ez adir verdena keyeyê to.''

Atabay wexto ke lokantaya Oz Urfa ra ver bi qereqolî şîyêne wesayîtêkî verê ey girewt. Kadrîye Çubuk û mêrdeyê ci Selîm Çubuk wesayîrî ra peya bîyî û Atabayî rê gef wend ke wa nêşoro qereqolî. Selîm Çubukî pê dare da Atabayî ro, Atabay kewt war û Çubukî erd de da ey ro.

Polîsêkê sivîlî cayê serebûtî de Çubuk vindarna. Çubuk şi û Atabay zî wedarîya Nêweşxaneyê Karasuyî. Seba ka Atabay sereyê xo ra zaf derbî werdê wedarîya Nêweşxaneyê Yenîkentî yê Adapazari. Tîya de sereyê Atabay ame derzayene.

Atabay 26ê temmuze de îfade da Amirîya Merkezê Polîsan û gerreyê Çubukî kerd. Atabayî da zanayene ke Kadrîye Çubukî çîyê provakatîfî vatî û gerreyê aye zî kerd. Çubuke ameye destbendkerdene la dima vera dîyaye.

Polîsan waşt ke muxtar mabênê Atabay û Çubukî bikero. Atabayî vat: ''Muxtarî nêverda ke vîdeoyê ke ameyê girewtene ma biweşanê. Muxtar kewt verê findiqan û vat 'Eke ti vîdeoyan pare bikerî kes nêno tîya de nêxebitîyeno. Muxtarî waşt ke ma pêbikero. La mi nêwaşt. Înan ez kiştişî ra xirabêr kerda.''

Emîne Atabay zî vera hêrişî nêrazîbîyayîşê xo mojna û ard ziwan ke înan waşt ke mêrdeyê ci bikişê. Emîne Atabay pare kerd ke Çubuk saetêke ra dima vera dîya û ê mexdûr bîyê. Emîne Atabay vat ke heta ke Çubuk nêro cezakerdene ê do dewaya xo ra fek vera medê.