Warê serebirnayîşê heywanan ê dewa Kavakli yê qezaya Altindagî yê Anqara de mabênê di keyeyanê cîyayeyan de semedê heywanan ra pêrodayîş vejîya. Endamanê keyeyê kirikkaleyîjî pê çekan hêrişê keyeyê Boztaşî yê mêrdînijî kerd.

Hêriş de keyeyê Boztaşî ra 2ê ci giranî 4 kesî birîndar bîyî. Ferît Boztaş û Feyyaz Boztaş wedarîyayî Nêweşxaneyê Anqara û ameyî amelîyatkerdene. Birîndarê bînî Tuncer Boztaş û Halîs Boztaş wedarîyayî Nêweşxaneyê Perwerde û Cigêrayîşî yê Dişkapi Yildirim Beyazitî. Ame parekerdene ke hêriş de hemwelatîyê ke ameybî heywanan sere bibirnê birîndar bîyî. 

Endamanê keyeyî ra Ferhat Boztaşo ke derheqê serebûtî de ajansê Mezopotamya rê qisey kerd vat: ''Ma û keyeyo kirikkaleyîj cîranê yewbînan ê. Mabênê ma û înan de warêko veng esto. Ma pisîya heywanê xo eşte uja. Coka şer vejîya. Keyeyê kirikkalejîjî pê ma heqaret kerd, ma rê gef wend. Tewr tay 150 kesan hêrişê ma kerd. Dima 4 kesan pê çekan hêriş kerd. 4 birayê mi bi giranî birîndar bîyî. Xora zerrîya înan pê kînê vera kurdan dekewte ya.''

Boztaşî pare kerd ke polîsan keyeyo hêrişkar pawito û vat: ''Nobetdaran nêweşxane de merdimê ma vindarnayî û hêrişê înan kerd. Birayê mi verê nêweşxaneyî de ronişte bi. Nobetdaran tira vat ke wa uca ra dûrî bo û dima hêrişê ci kerd. Dima polîsî ameyî înan bêpers vera ma gazê îsotî şuxilna û pê copan hêrişê ma kerd. Bedenê ma de hema zî rêçê pêrodayîşî estê. Dima ez û birayê mi zî tede xeylêk kesî ameyî destbendkerdene.''

Şahîdanê serebûtî ra Aydin Yildiz Tîlbeyî zî îfade kerd ke serebûtî ra dima destûr nêdîya ke keyeyo kurd bikewo dewe û keye hetê leşkeran ra ame astengkerdene.