26ê Têşrîna peyên a 1993î de dewleta Almanya qedexeyê PKKyî îlan kerdbi. Qedexeyo ke keweno serra 25. hetê kurdan û hetanê demokratan ra bi aktîvîteyanê cîya- cîyayan yeno protestokerdene.

Nê aktîvîteyan ra yo tewr muhîm zî paytext Berlîn de 1ê Kanûne de do bêro viraştene. Xeylî sazîyê sivîlî, merdimê zanaye, akedemîsyen, huqûqkar, parlamenter, rojnameger û pawitoxê heqanê merdiman çalakîyêka hempare organîze kenî. Çalakî û mîtîngo ke do bi sloganê ‘‘waştişê azadîye nêno qedexekerdene - vera qanûnê polîsan, qedexeyê PKKyî û nîjadperestîye mucedeleyo hempar‘‘ bêrê viraştene.

Komîteya hadreyîye ke ANFyî rê qisey kerd ard ziwan ke hadreyîya înan qedîyaya û ê wazenê ke heme demokratan 1ê Kanûne de Berlîn de bivînî.

Komîteye vat: ‘‘Çi heyfo ke çepê almanya teng ewnîyeno qewimîyayîşan ra. Ma wazenê ke naye bişiknê û qedexeyê serê PKKyî hîna hîra ramojnê. Almanya de hetêk ra mîyanê almanan de elqedarîya PKKyî zaf bîya, heto bîn ra hemkarîya dewleta alman û rejîmê dîktatorîye ya dewleta tirkî bihêz biya. Almanya çend şino hetê raştgirîye ser şina. Partîya raşte ya AfDyî reyanê xo zêdînena û sîyasetê welatî ver bi hetê raştî  xij beno. Hêrişê nîjadperestî zî çend şino zafêr benî. Hukmat zî wazeno qanûnanê hîna sertan vejo. No qanûnê polîsan zî nînan ra yew o. Goreyê nê qanûnî bê vejîyayîşê dadgehe polîsî eşkenî merdimî hewteyêk binçim de tepişî. Ma naye Tirkîya ra nas kenî.’’

Komîteye bale ante hêrişê dewleta almanî yê vera sîyasetmedaranê kurdan ser û va: ‘‘Bi seyan dewayî bîlaheq ameyî akerdene. Tena qedexeyê PKKyî vera kurdan şuxulnenî. No qedexe destûr nêdano ke meselaya kurdî ser o zî eşkera bêro qiseykerdene.‘‘

Komîteye vat: ‘‘Bi taybetî zî bi sebebo ke PKKyî Êzidîyî çeteyanê DAÎŞî ra xelisnayî sempatîya girde ya şarê almanî PKKyî rê esta. Reyna seba ke PKK vera dîktatorîya Erdoganî mucadele keno zî ci rê zaf eleqedarîye esta. Bi qala kilme seba şarê almanî PKK rêxistina terorî nîyo.‘‘