Seba protestokerdişê tecrîdê girankerdeyî yê serê Rayberê Şarê Kurdî Abdullah Ocalanî û seba baleantişê serê çalakîyanê grevê vêşanîye yê ke bi serkêşîya Hemsereka KCD’yî û parlamentera HDP’yî Leyla Guvene ke bi amacê şikitişê tecrîdê serê Ocalanî yenê domnayene do 27’ê Sibate de Bruksel de rayraşîyayîş û mîtîngêk bêro viraştene.

Dîwanê Hemserekîya KCDK-E’yî eşkerayîyêka nûştekîye weşanaye û ard ziwan ke xoverdayîşê hemleya “Tecrîdî bişiknê, faşîzmî birijnê” roja xo ya 108’ine de bi qerardarîye dewam keno. Dîwanê Hemserekîya KCDK-E’yî vat; “Grevê vêşanîye yê hemsereka KCD’yî û parlamentera HDP’yî roja 108’ine de yo, yê Nasir Yagizî roja 95’ine, yê zîndanan roja 70’ine, yê Strasbourg û Gallerî zî roja xo ya 69’ine de yo û çalakwanê grevî bi ruhê fedaîyî xo ver danê.”    

Eşkerayîya KCDK-E’yî wina dewam kena:

“Ma reyna anê ziwan, sere de Leyla Guvene û Nasir Yagiz halê weşîye yê çalakwananê grevê vêşanîye ameyo verê sînorê mergî. Cuya çalakwanan destê ma de ya. Eke ma pîya bi înan xo ver bide, doş bide doşê înan û mucadele bikerê ma do cuya înan bixelisnê. Ê vanê ‘heta tecrîd nêro şikitene bedelê ci çi beno wa bibo ma hadre yê bide.’

A game xelisnayîşê cuya înan ma dest de yo. Cuya înan şikitişê tecrîdî dir pabeste ya û naye ra zî ma Ewropa de bikewê prosesê mucadeleyê bêpeynîyî mîyan. Her kesê ke xo ra vanê ma Kurd ê, her cinî, her ciwan, her şorişgêrêk, sosyalîstê ke vanê ‘ma merdim ê’ ganî tewrê prosesî bibê. Gama ke Leyla Guvene, Nasir Yagiz, Gulistan Çîya Îke û çalakwanê bînî seba tedawîye benê nêweşxane ê tedawî red kenê. Wezîfeyê ma yê bicaardişê nê mesajan esto. Ma reyna veng danê ke roja 27’ê Sibate de ma nêşirê kar û mektebe û seba xelisnayîşê cuya çalakwananê grevê vêşanîye tewrê rayraşîyayîş û mîtîngê Brukselî yo ke do vernîya sazîyanê mîyanneteweyîyan ê Ewropa de bêro viraştene bibê.”