Kurdistanij ê ke Ewropa de ciwîyenê, seba wedaritişê tecrîdkerdişê Rayberê Şarê Kurdî Abdullah Ocalanî û waştişanê çalakwanê grevê vêşanîye verê Konseya Ewropa de çalakîya roniştişî ya girseyî dewam kena.

Çalakîya roniştişî bajarê Strasbourgî yê Fransa de verê Konseya Ewropa (KE) de vizêrî hetê se kesan amebî destpêkerdene. Sere de Almanya zaf welatanê Ewropayî ra 150 kesan ra zêdeyî kesî beşdarê çalakîya roniştişî bîbî. Yeno pawitene ke saetanê verê ma de na hûmara do biresa 200 kesan.

Bêvengîya vera tecrîdî ame protestokerdene

Saetanê şodirî de temsîlkarê dezgehanê Kurdan ê cîyayan zî mîyan de Kurdistanijî verê banê KE de ameyî têhet, verê Avenue de l’Europe de çalakîya rêzile ya merdiman viraşte. Çalakîye de bi Kurdkî û Franskî silaganê “Kurdistanî rê çareserîya bihaştîye”, “Ocalanî rê azadîye”, “Terorîst Erdogan”, “Qatilkar Erdogan”, “Silam silam, Îmraliyî rê hezar silamî” û” Biciwîyo xoverdayîşî zîndanan” ameyî qîrîyayene. Bado girse ame cayo ke çalakîye nobete Ocalanî rê azadîye dewam kena.

Xebatê dazanayîşî

Çarçewaya çalakîya roniştişî ya girseyî ya verê EP’yî de, seba ke dazanayîşan bidê kesê ke dorûver ra derbaz benê xebatî dewam kenê.  Verê EP’yî bi seyan kesan rê vilawekî yenê vilakerdene û derheqê tecrîd û xoverdayîşê grevê vêşanîye de zanayîşî yenê dayene.

Heta şan aktîvîteyî do bêrê kerdene

Goreyê zanayîşê ke komîteya Tertîpî dayê,  ewro heta şan aktîvîteyê cîyayî do bêrê kerdene.  Çalakwanî ewro vera şanî derheqê Şorişê Rojawanî û Ameyoxê Vakurê Sûrîye de semînerêk do amade bikerê. Çalakwanî, serkewtişê Baxozî yo ke çeteyê DAÎŞ’î ameyê binkerdene do pîroz bikerê. Ame vatene ke heta peynîya çalakîye hunermendê TEV-ÇAND’î verê KE  de girseyî reyde do bibê. Yeno texmînkerdene ke çalakîya roniştişî ya verê KE’ her ke şina do zêdetir biba.