Colemêrg de vera destsernayîşê şaredarîye DEM Partî 13ê hezîrene de do bi şîarê ''Şaredarîyî yê ma yê, ma destûrê destsernayîşî nêdanê'' mîtîng bêro kerdene. Verê mîtîngî qezaya Şemzînan de Rayraşîyayîşê Demokrasîyî dîya destpêkerdene. 

Rayraşîyayîş serkêşîya KCD, HDK, DEM, TJA, DBP, Îtîfaqê Kede û Azadîye û Rêxistinanê Komelê Sîvîlî de yeno kerdene. Verê rayraşîyayîşî yo ke do hîrê rojî dewam bikero, eşkerayîye ameye dayene.

Hemsereka  DEM Partî ya Colemêrgî Humeyra Armut veng da ke wa her kes 13ê hezîrane de tewrê mîtîngî bibo.

Wekîlê DEMî Saruhan Oluçî nê vatî: ''No têkoşînê edalet, azadîye û demokrasî yo. No têkoşîn her ca de dewam keno. Têkşînê ma yê vera xespkerdişê îradeyî û dişmenîya vera şarê kurdî dewam keno. No îqtîdar qeyûmî ra hes keno. 8 serrî yo bi qeyûman îradeyê şarî yeno xespkerdene. Qeyûm yeno manaya xespî, dizdîye û çînhesibnayîşê îradeyê şarê kurdî. Ma do çirey nê qebul mekerê. Ma do her ca de bi hewayêkê qerardarî têkoşînê xo bidomnê. Ma startê mîtîngê xo yê 13ê hezîrane danê.  No têkoşîn do her cayê Tirkîya û Kurdîstan de dewam bikero. Ma do pîya kesanê ke çok nêdanê û wayîrê wîjdanî yê nê têkoşîn xurtêr bikerê. Ma sindoq de cewabê nê îqtîdarî da. Ma do kuçeyan de zî cewabê ci bidê.''

Badê qiseykerdişan rayraşîyayîşî dest pêkerd. Raywanî ewro do dewan û dewekanê Şemzînan û Geverî zîyaret bikerî û qalê texrîbatê xespkaran bikerî. Siba zî do Geverî ra ravîyarê Çelê û badê nê kombîyayîş û têhetameyîşan 13ê hezîrane de biresê merkezê Colemêrgî.