Derheqê weçînayîşê herêmîyî de mabênê serekkomaro tirk Recep Tayyîp Erdoganî û serekê pêroyî yê MHPyî Devlet Bahçelîyî de pêvînayîş ame kerdene,  bi heman amacî mabênê CHP û IYI Partî de zî hemparîyêk virazîyaye.

Pêvînayîşo ke bi serektîya Erdoganî virazîya ra dima vervatoxê AKPyî Omer Çelîkî vat ke, ‘Pêvînayîş zaf baş vîyart.’

Çelîkî qiseykerdişê xo wina domna, ‘Pêvînayîş bi memnunîyet ame kerdene, ez eşkena vaja ke ma, hemparîya ke seba weçînayîşê herêmî bena de zî nuqteyêka başe de yî, nuqteya ke ma memnun kena de yî.’

Vervatoxê AKPyî vat, ê do roja şemeyî namzetê Enqere, Stenbol û Îzmîrî zî mîyan de namzetê 40 şaristanan eşkera bikî. Çelîkî da zanayene ke do demê nêzdî de çarçeweya îttîfaqê AKP û MHPyî zelal biba.

Hetkarê serekê pêroyî yê IYI Partî Koray Aydin û endamê Meclîsê Partî yê CHPî Bulent Tezcan ameyî yewca. No derheqê weçînayîşî de bi pêvînayîşo diyin.

Aydinî pêvînayîşî ra dima Merkezê Pêroyî yê IYI Partî de cewab da persanê rojnamegeran. Persêk ser o Aydinî vat ke, ‘Ma do timûtim bêrî yewca. Ma ewro pêvînayîşê xo qedîna. Ma seba dîyarkerdişê prensîbanê bingehênan resayî mutabaqatêk. Nê mutabaqatî ser o seba demê ameyoxî, ma xerîteya rayîrî vete.’

Aydinî cewab da persa ‘Mabênê CHP û IYI Partî de çiyan ser o mutabaqat ame kerdene?’ û vat ke, ‘Şaristananê girdan de ma qadê cêr û corî xêz kerd. Nika ma do mîyanê aye bikî de. Ma qet nêkewtî babeta nameyî. Eke ma qade terîf bikî ma do bieşkî mîyanê ci bikî de, aye asan a.’