Rixmê pêro astengkerdişê polîsan şarî Meydanê Kartalê Îstanbulî de Roşanê Ziwanê Kurdkî bi deyîran fîraz kerd û ard ziwan ke heta ke kurdkî biba ziwanê perwerdeyî û ziwano fermî ê do têkoşînê xo rê dewam bikerê.
Ame waştene ke serkêşîya Enstîtuyê Kurdan ê Îstanbulî de Meydanê Kartalî de bi wesîleya 15ê Gulane Roşanê Ziwanê Kurdkî rayraşîyayîşêk bêro kerdene la polîsan rayraşîyayîş asteng kerd. Wekîla HDPyî Merale Daniş Beştan û Hemserekê HDPyî yê Îstanbulî Ferhat Encuyî zî paştî daye rayraşîyayîş.
Astengkerdişê polîsan ra dima girseyî çalakîya roniştişî kerde û erbaneyan reyde deyîrê kurdkî vatî.
Aktîvîte de Maya Haştîye Fince Akman qisey kerd û îfade kerd ke dinya de kurdkî ra ber ziwanêko bîn qedexe nîyo û ganî hişmendîya ke kurdkî qedexe kena wa bişerma.
Ferhat Encuyî zî pare kerd ke dewleta tirke ya faşîste kurdkî qedexe kena, nameyanê kurdkî vurnena û wazena kurdkî çin bikera. Encuyî vat: ''Bedelê ci çi beno wa bibo ma do bi serbestî ziwanê xo qisey bikerê. Heta ke kurdkî biba ziwanê perwerdeyî û ziwano fermî ma do têkoşînê xo rê dewam bikerê.''
Merale Daniş Beştaş dîyar kerd ke wayîrvejîyayîşê ziwanî wayîrvejîyayîşê xobîyayîşî yo û vat: ''Ziwanê ma rûmetê ma yo û ma do heta peynî ziwanê xo bipawê. Nê welatî de kurdan rê dişmenîye yena kerdene. Polîsî nêverdenê ke ma seba ziwanê xo rayraşîyayîşî bikerê.''
Qiseykerdişan ra dima girseyî govende girewte.
