Komîteya Perwerdeyî ya KCKyî bi wesîleya 15ê Gulane Roşanê Ziwanê Kurdkî mesajêk şawit.

Mesaj wina yo:

''Ma sey Komîteya Perwerdeyî ya KCKyî Roşanê Ziwanê Kurdkî yê Rayber Apoyî, şehîdanê ma yê bêmergan û ê şarê ma yo ke rixmê teda û asîmîlasyonî bi ziwanê xo deyîrî, estanikî vatî, vera neyarî çok nêdayo erdî ro,  fîraz kenê.

Ziwan têna hacetêkê têkilîye nê seba şarêkî hacetêko tewr girîng ê yê cuya bi nasname û kulturî yo.  Her ziwan bingeyê tarîx, kultur, edebîyat, huner û felsefeya cuye yê komelê xo yo. Şarê ma bi serran o vera hêrişanê qirkerdişê kultur, ziwan û estbîyayîşî, her tewirê bedelê giranî dayî la qetî pawitiş û wayîrvejîyayîşê kultur û ziwanê xo ra fek vera nêda.

Ma sey şar û raywananê têgêrayîşê azadîye yê nê şerî Rojhelatê Mîyanênî de, çimeyê di raştîyanê cuye ser de vindenê û serkêşîya nê raştîyan kenê: redkerdişê înkarê tarîxî û redkerdişê înkarê nasname, estbîyayîş, ziwan, veng û fikran. Yanî ma dewaya xobîyayîşî kenê. Homayî ma senî afernayê, ma dadîye ra senî bîyê, bi kamyew ziwanî bîyê merdim, ma xîret kenê ke na raştîya xo biciwîyê. Ma seba pêro ziwan, veng û rengan azadîye wazenê.  Ganî nêro vîrakerdene ke ma hem hetê demokrasî de hela tewr tarîxîye de yê, hem zî mekanêkê tewr rengdarî yê tarîxî de yê. Nê mekanî de ke nasname, komel, ziwan, dîn û şar yenê têhet, cuya pîya ya rengarenge seba şaran do biba roşanêkê tewr manadarî. Coka Şorişê Rojawanî het hetî ra yeno manaya nê roşanî.

Rayberê ma vano 'Asta averşîyayîşê ziwanî, asta averşîyayîşê cuye yo. Komelêk ziwanê xo yê dayîke çend aver bero, asta xo ya  cuye zî hende aver beno. Komelêk çend ziwanê xo vînî bikewo hede keweno binê serdestîya ziwananê bînan, hende yeno îşxalkerdene, asîmîle û qir beno. Komelê ke wayîrê na raştîye yê, hetê hişmendî, exlaq û estetîkî ra nêeşkenê wayîrê cuyêka manadar bibê û sey komelanê nêweşan heta çinbîyayîşî benê mehkumê cuyêka trajîke.' Raşt o ke ziwan nasnameyo hempar, sereberzîya rinde û vîro hempar ê komelan o. Pawitiş û averberdişê vîrê hemparî yê komelî, bi pawitiş û averberdişê ziwanê dayîke beno. Pênasekerdişê kurdkî bi rengê qedexe, tehluke, cîyakerdîye, kanwazîye û barbarîye eslê xo de sîyasetê werte ra wedarnayîşê estbîyayîşê kurdan o. Ganî ma vera nê qirkerdişî bi qiseykerdişê kurdkî, bi nuştişê kurdkî û bi rêxistinkerdişî xo ver bidê û têkoşînê wayîrvejîyayîşê ziwanî û berzkerdişê nê têkoşînî bizêdînê. Nê halî de no seba wayîrvejîyayîşê sibayanê azadan erkê pêro kurdan o.

Roşanê Ziwanê Kurdkî vera polîtîkayanê asîmîlasyonî qezençkerdişê zanayîş, vera sîyasetê çinkerdişê xoverdayîş û vera hişmendîya bêvîr verdayîşî roja wayîrvejîyayîşê vîrê komelî yo. Ziwanê kurdkî raştîya xobîyayîşê şarê kurdî ya. Wayîrvejîyayîşê ziwanî sey vizêrî ewro zî hewcedarîya tewr sereke ya estbîyayîşê ma yê sîyasî, tradîsyonê ma yê têkoşînî û vera tarîxî deynê ma yo.

Ganî ma xo vîr a nêkerê ke ziwan bi rayîrê neslê ciwanan pawîyeno û derbazê neslanê neweyan beno. Bi perwerde, edebîyat, huner û kulturî ziwan beno rind. Coka ganî ma xebatanê rojaneyan ra heta projeyanê berardişê komelkî, bi rayîrê şuxilnayîşê ziwanî, bi cuye, bi rayîrê ziwanê xo têkilîye aver berê, cuya neteweya demokratîke bikerê tercîho veren ê pêro ziwanan. Netîce de zî ma 'têna şorişî mekerê, bibê şorişê xo.' Girîng o ke şarê ma çi teber de çi welat de ganî qiseykerdiş û nuştişê bi kurdî sey çalakîyêka bingeyî ya wayîrvejîyayîşê ziwanî bivîno, her ca de seba perwerdeyê bi ziwanê dayîke û wedaritişê astengîyanê qanûnîyan ê vera ziwanê dayîke têkoşînêkê xurtî bikero û qetî rayîr medo polîtîkayanê asîmîlasyonî.

15ê Gulane Roşanê Ziwanê Kurdkî yo ke hetê bînî ra serrgêra 90. ya ronîyayîşê Kovara Hawarî ya, reyna şarê ma rê fîraz bo. Ma kesayetê Celadet Elî Bedirxanî û embazanê ci de pêro kesanê ke bi ked û bedelanê giranan ziwanê kurdkî aver benê û pawenê selam kenê.''