Beyannameyê Konferansê Kurdan ê Parlamentoya Ewropa ke 5 û 6ê Kanûne de reya 15ine ame viraştene, ame aşkerakerdene.
Konferanso ke her serre bi hawayêkê tradîsyonkîyî yeno viraştene Komîsyonê Hemwelatijê Tirkîye yê Yewîya Ewropa (EUTCC), Kongreya Kurdistanî ya Neteweyîye (KNK), Enstîtuya Kurdan a Brukselî û KURD-AKAD serkêşîya ci kerd. Çepê Yewbîyayeyî yê Ewropa / Zergûnê Vakurî (GUE-NGL), Îtîfaqo Aver ê Zergûn û Sosyalîst-Demokratan (S&D) û şexsîyetê namdarî yê mîyanneteweyîyî zî paştî da ci.
Konferans de babetê sey tecrîdê serê rayberê şarê Kurdî Abdullah Ocalanî, rolê Ocalanî, qerarê sazîyanê huqûqîyan ê Ewropa, faktorê Kurdan jeopolîtîkê Rojakewtena mîyanêne de, NATO û Rojakewtena mîyanêne, vetişê PKKyî lîsteya terorî ya Ewropa ra û Federasyonê Vakurê Sûrîye yo Demokratîk gerîyayî dest.
Beyannameyê Konferansê Kurdan ra tayî madeyê wîna yê:
Wa dezgeyê Ewropa, dewletê Yewîya Ewropa, Yewîya Miletan, Papa Francis û Amerîka seba serbestveradayîşê Abdullah Ocalanî hukmatê tirkî rê zext bikerê.
Wa Konseyê Ewropa seba wedartişê tecrîdê serê Ocalanî tê bigêro û Komîteya Vernîgirewtişê Îşkenceyî (CPT) cadê Îmrali de Abdullah Ocalanî zîyret bikero.
Wa mabênê şarê kurdî û dewleta tirkî de reyna muzkereyî bêrî despêkerdene.
Wa PKK lîsteyê terorî yê Yewîya Ewropa ra bêro vetene.
Wa hêzê mîyanneteweyîye îşxalkerdişê Efrînî yê dewleta tirkî rê bêveng memanî.
Wa seba weçînitişanê cayîyan ê 31ê Adere yê 2019î Ewropa ra heyetî şirê Tirkîya û destûr nêheqîyan medî.
Wa hêrişê hewayîyî û îşxalê dewleta tirkî yê Başûrê Kurdistanî yê ke eşkera eşkera huqûqê mîyanneteweyîye îxlal kenî, bêrî vindarnayene.