Sîyasetmedar, nuştox û temsîlkaranê dezgehan semedê tewrbîyayîşê rayraşîyayîşê Dusseldorfî yê 12ê teşrîna peyêne veng da û vat: ''Wa qîrayîşê ma qirkerdoxanê ke çekanê kîmyewîyan şuxulnenê rê bibo derd û gerîlayan rê bibo nefes.''
Sîyasetmedar, aktîvîst û temsîlkaranê dezgehan semedê tewrbîyayîşê rayraşîyayîşê merkezî yo ke do bajarê Dusseldorfî yê Almanya de 12ê teşrîna peyêne de bêro kerdene, veng da.
Hemsereka KCDK- E Fatoş Goksungur: Ma sey KCDK-E 12ê teşrîna peyêne sey Roja grevê vera çekanê kîmyewîyan a Ewropa îlan kerd. Ma vera sûcê şerî yê dewleta tirke na roje verê xo bidê Dusseldorfî û wayîrê gerîlayan vejîyê. Gerîla cuye yo. Gerîla azadîye yo. Bijî berxwedana gerîla!
Hemsereka KCDK- E Yuksel Koç: Ganî 12ê teşrîna peyêne de ma cuye bidê vindarnayene. Wa çew her kes kar û keyeyê xo ca verdo û verê xo bido Dusseldorfî û semedê ameyoxê kurdan wayîrê gerîlayan bivejîyo.
Hemsereka Kongreya Înşa ya Dêrsimî Hulya Yer: Dewleta tirke ya îşxalkere 1938 de pê gazanê jehrinan bi des hezaran merdimê ma qetil kerdî. Ewro zî verê çimanê dinya de Zap, Avaşîn, Metîna û xeylêk cayanê Kurdîstanî de çekanê kîmyewîyan şuxulnena ke qirkerdişê xo bikero temam. Seba ke ma hemkarê nê sûcî mebê, ganî ma vengê xo berz bikerê. Sere de dêrsimijî ganî her kes tewrê çalakîya Dusseldorfî bibo. Ma do hinî biqîrê ke qîrayîşê ma sey qesasê 1938î qirkerdoxê ke çekanê kîmyewîyan şuxulnenê rê bibo derd û gerîlayan rê bibo nefes.
Xoşnav Atayo ke 99 rojî yo verê OPCWyî de çalakîye de yo: Seba ke ma vengê xo bidê eşnawitene û gerîlayan rê bibê nefes ma tewrê çalakîya Dusseldorfî bibê. Serkewtişê yê şarê ma yo. Bijî gerîla!
Serekê Pêroyî yo Ronayox ê SYKP Tuncay Yilmaz: Dewletê dinya yê ke çekan roşenê û şer wazenê vera şuxulnayîşê çekanê kîmyewîyan ê dewleta tirke bêveng ê. Kam ke haştîye wazeno ganî vera nê hêrişan tewrê çalakîya Dusseldorfî bibo.
Rojnameger-nuştox Hayko Bagdat: Rejîmê AKP-MHPyî vera merdimîye sûc keno. Seba Şebneme Korur Fîncanci waşt wa şuxulnayîşê çekanê kîmyewîyan bêro cigêrayene cade lezabez a eşte zîndan. Xora no zî eşkera sûcê înan mojneno. Ma 12ê teşrîna peyêne de pêro pîya vera nê hêrişan vengê xo berz bikerê.
Sîyasetmedare Nusele Aydogan: Dewleta tirke pêkerdişanê mîyanneteweyîyî binpay kena û çekanê kîmyewîyan şuxulnena. Ganî şar û dostê ma vera nê hêrişan bêveng memanê. Bêrê ma pêro pîya heyna vajê ke şuxulnayîşê çekanê kîmyewîyan sûc o.
Sîyasetmedare Tugba Hezer: Çekê kîmyewîyî heme dinya de qedexeyê la dewleta tirke vera kurdan şuxulnena. Bêrê ma 12ê teşrîna peyêne de Dusseldorf de bêrê têhet û bi vengê xo bêvengîya dinya bişikinê.
Endamê Koordînasyonê ADKMyî yê Ewropa Ayaz Selçuk: Hêrişê vera gerîlayanê kurdan vera heme şorişgêran ê. Bêrê ma vera nê hêrişan vengê xo berz bikerê.
Vervatoxa ADDKİ ya Ewropa Semra Uzunok: Şuxulnayîşê çekanê kîmyewîyan sûcê şerî yo ke ganî vera ci ma vengê xo berz bikerê. Eke ewro nê key?
