20ê hezîrane Roja Multecîyan a Dinya ya. Bi hezaran multecîyî welatanê Rojhelatê Mîyanênî, Asyaya Mîyanêne ra kewenê rayîrî şinê Wanî û şaristananê sînorî yê bînan. Na raywanîye de bi seyan multecîyî serê sînorî de mirenê.

Nê multecîyî bi taybetî sînorê Ebex, Qerqelî, Sêrê û Elbakî ra derbazê Wanî benê dima zî Gola Wanî ra derbazê Tetwanî benê. 

Goreyê hûmaranê fermîyan Wan de mabênê serranê 2019-2022yî de 49 multecîyan serdî ra dinyaya xo bedilnaya, 68 multecîyî Gola Wanî de xeniqîyayê, 42 multecîyî qezayanê trafîkî de merdê û 3 multecîyî zî hetê leşkeran ra kişîyayê.

27ê hezîrana 2020î de Westan de keştîya multecîyan cumê awe bibî û 61 multecîyan dinyaya xo bedilnabî. Cenazayê 20 multecîyan hema zî vînîbîyaye yê. Serebûtî ra dima teyna kaptanê keştîye tepişîya. 

Tay serebûtê multecîyan ê ke Wan û dormeyê ci de qewimîyabî wina yê:

*Qezaya Sêrê ya Wanî de mînîbusa multecîyan bîye hedefê guleyanê leşkeran. Serebût de domanêk merd, 12 kesî zî birîndar bîyî.

* Sêrê de 2 leşkeranê tirkan cinîyêka afgane rê tecawuz kerd.

* Çeleyê 2022yî de Sêrê de 2 multecîyan serdî ra dinyaya xo bedilnaye.

* 2020 de cenazayê 3 multecîyan ameyî dîyene.

* Serê sînorê Elbak û Rojhelatê Kurdîstanî de dima ke vewre helîyaye cenazayê 21 multecîyan ameyî dîyene.

* 2020 de 40 multecîyan serdî ra dinyaya xo bedilnaye.

* 2020 de Ebex de 13 mutecîyan serdî ra dinyaya xo bedilnaye.

*2019 de qezaya Elcewazî ya Bedlîsî de keştîya multecîyan cûmê awe bîye û 7 kesan dinyaya xo bedilnaye.

* Elbak de vewre helîyaye dima 1ê nîsana 2019î ra heta 6ê gulana 2019î, cenazayê 25 multecîyan ameyî dîyene.

* Serê sînorê Îran-Wanî de 12ê nîsana 2019î de cenazayê 6 multecîyan ameyî dîyene.

* 11ê temmuza 2022yî de serê rayîrê Wan-Erdîşî de mînîbusa multecîyan qeza kerd û netîceya qezayî de 13 multecîyan dinyaya xo bedilnaye, 26 multecîyî birîndar bîyî.

* 2019 de qezaya Rêya Armûşî de mînîbusa multecîyan qeza kerd û tewr tay 17 multecîyan dinyaya xo bedilnaye.

* Wan de 7ê çeleyê 2023yî de leşkeran multecîyî dayî guleyan ver û 2 multecîyî ameyî qetilkerdene.

Cenazayê nê multecîyan Goristanê Bêkesan de, taxa Seyrantepe ya Wanî de yenê definkerdene.