Namzedê Şaredarîya Wanî ya DEM Partî Abdullah Zeydan sey Hemşaredarê Wanî amebi weçînayene. La îtîrazê AKPyî ser o Heyetê Weçînayîşî yê Wanî mazbata nêdaye Zeydanî û daye namzedê AKPyî.

Bi hezaran kesan heta serê sibayî kuçeyî nêteriknayî. Hêrişê polîsan ra dima tewirê şarî zî zêdîya. Çalakîyî taxanê Cumhuriyet, Ordu, Maraş, Mîllî Egemenlîk, Akkopru, Îkînîsan, Kişla, Orhan Doganî de ameyî kerdene û şarî TOMAyî vêşnayî. Paşîv de şar şi keyeyê xo. Polîsan hêrişê keyeyan kerd û gazê îsotî verda zereyê keyeyan. Kuçeyê taxa Halîlagayî de polîsan heta serê sibayî gazê îsotî eştî cade û bînayan.

Ewro zî esnafan dikanê xo anêkerdî. Saete 11.00 de do 7 noqtayan de rayraşîyayîşî do bêrê kerdene û darbeya AKPyî do bêra protestokerdee.

Hetê bînî ra serê sibayî polîsan eşt xeylêk adresan ser û xeylêk kesî destbend kerdî. Sereştişan de şarî rê îşkence ame kerdene. Naye ser o şarî ancî dest pê protestoyan kerd. Bi hezaran polîsî sewqê merkezî ameyî kerdene.  Kuçeyan de ancî TOMAyî ameyî cakerdene.