Operasyonê qirkerdişê sîyasîyî dewam kenê. Ewro reyna Mêrdîn, Îzmîr, Adana, Hatay û Mersin de sereştişê keyeyan de xeylêk kesî ameyî destbendkerdene. Wan de operasyonê sîyasîyî yê vera îdarekar û endamanê Partîya Demokratîke ya Şaran (HDP) ameyî şermezakerdene.

Perey endamê Meclîsê Ciwanan ê HDPyî yê Wanî Nurullah Pekbay, Şiyar Akti, Ferhat Azan û Şerif Saribulak ameybî destbendkerdene. Rêxistina HDPyî bi eşkerayîyêke hêrişê vera HDPyî şermezar kerdî. Eşkerayîya ke verê banê HDPyî yê Rêya Armûşî de ameye kerdene Wekîl HDPyî Wanî Murat Sarisaç û  îdarekarê HDP, DBP û xeylêk dezgehanê bînan tewrê ci bîyî.

Endamê Meclîsê Ciwanan ê HDPyî Şervan Beyazitî ard ziwan ke partîya înan hêrişê faşîstî yê îqtîdarê AKP-MHPyî dir rî bi rî ya û vat: ''Bi hewayêkê bêhuqûqî hêrişê endamanê meclîsê ma kenê. Reyna xeylêk bajaranê bînan de zî hêrişê vera HDPyijan dewam kenê. Pê nê hêrişan kenê ke sîyasetê demokratîkî krîmînalîze bikerê. La rixmê heme hêrişanê îqtîdarî adresê ciwanan HDP yo. Meclîsê Ciwanan ê HDPyî vera pêro polîtîkayanê asîmîlasyon û qirkerdişî payan ser o û falîyetanê xo domneno. Ganî hetê demokratîkî vera nê hêrişan bêveng memanê.  Seba ke êyê ke raştê hêrişan yenê kurd ê, bêveng memanê. Na bêhuqûqîye do rojêke bido şima ro zî.''