Wan de HDP,CHP, EMEP, ESP û 23 Rêxistinanê Komelê Sîvîlî  vera qirkerdişê Konya ke eynî keyeyî ra 7 kesî hetê nîjadperestanî ra ameyî qetilkerdene, eşkerayîya hempare daye.

Eşkerayîye hetê Serekê ÎHDyî yê Wanî  Mehmet Karataşî ra ameye wendene. Karataşî vat: ''No qirkerdiş nişka ra nêbi, eşkera vat ez ha yena. Kiştoxan verî zî hêrişê keyeyî kerd la nêameyî tepiştene.  Hêrişê nîjadperestî yê vera HDP û kurdan pabesteyê polîtîkaya îqtîdarî yê. Partîya îqtîdarî qirkerdiş şermezar nêkerd. No zî ramojneno ke wayîrê kiştoxan vejîyenê.

Ma sey Hêzanê Kede û Demokrasîyî yê Wanî nê hêrişanê qirkerdişî şermezar kenê. Ma veng danê ke eşkerayîye ke verê hêrişanê nîjadperesten ê vera nasnameyê kurdan û kurdkî akenê û verê haştîya komelkî genê wa bêrê caverdayene.  Ganî heme hetê komelî û partîyê sîyasîyî û rêxitenê demokratîke vera nê hêrişan vejîye û yewîya komelî bipawê.''

Badê eşkerayîye şar bi sloganan vila bi. Polîsan hêriş pê bombayanê gazî  û awa tazyîkine hêrişê şarî kerd. Hêriş de xeylêk kesî ameyî derbkerdene û 5 kesî bi derbkerdişî ameyî destbendkerdene.

Reyna Amed, Dêrsim, Şirnex, Êlih, Riha, Hatay, Îskenderun, Adana û xeylêk bajaranê bînan ê Kurdîstanî û Tirkîya de zî bi çalakîyan qirkerdişê vera kurdan ame şermerzarkerdene û îqtîdar sey berpirsîyarê hêrişî ame namekerdene. Çalakîyan de veng dîya hukmatî ke wa polîtîkaya hêrişkare û dişmenya vera kurdan caverdo.