Êlih de serranê 90an de bingeyê stratejîya şerê taybetî de xeylêk merdimî ameyî qetilkerdene. Babî Îbrahîm Çelîk û lajê ci Edîp Çelîk ameybî vînîkerdene û hema zî nînan ra xeberêke çin a. Feryale Çelîk seba ke aqîbetê babî û birayê xo eşkera bikera bi serran o têkoşîn kena. Feryale Çelîk ANFyî rê qisey kerd.

10ê temmuza 1994î de babî û birayê Feryale bi bahaneya mojnayîşê adresî ameyî berdene. Feryale şahîdîya ney kena. Feryale vat: ''Ma deweka Suguksuyî de mendêne. Babîyê mi zîret kerdêne, birayê mi Antalya de înşaetan de xebitîyayêne. Birayê mi Edîp Antalya ra agêrabi. 10ê temmuza 1994î de 4-5 kesanê maskekerdeyan da berî ro û înan babîyê mi ra waşt ke wa o înan bero adresêkî. Birayê mi hetê apê mi de bi. Wexto ke ame babîyê mi pers kerd. Dadîya mi ey rê vat ke kesanê maskekerdeyan babîyê ma berdo. Birayê mi zî şi. Ê çaxî ra nata babî û birayê mi ra yew xebere çin a.

A şewe dewe ra zaf merdimî ameyî berdene. Rojêke ra dima ma şîyî asayîş û cendirmeyan. La înan ma rê vat 'Şima çira ameyî tîya, şorê cayêkê bînî rê pers bikê.' Nê serebûtî ra dima tedaya Hîzbullahî dewa ma ser o zêdîyaye. Hîzbullah dewe de gêrayêne û notê sey 'No kes do bimiro' verê beran de verdayêne. Hîzbullahî pê çekan eşt keyeyê ma ser û gef wend ke ma dewe ra koç bikerê. Merdimê ma Sabrî şekerî xîret kerd ke verê koçkerdişî bigêro. Hîzbullahî o remna û înfaz kerd. A şewe ê kesanê maskekerdeyan keyeyê Sabrî Şekerî pers kerdbî. Cenazaya Şekerî çend rojî dima ke ame remnayene dîyaye. O pê kindirî amebi qetilkerdene.

Dadîya mi û ma muracatê zaf cayan kerd la bêcewab mendî. Derheqê serebûtî de ma dozgerîye de gerreyê endamanê Hîzbullahî Talat Ruzgar, Azîz Onluk, Îlhan Onluk, Resûl Guneş û Çetîn Dûrsûnî kerd. La muracatî bênetîce mendî. Ma reyne nêeşkayî babî û birayê mi ra xeberêke bigêrê.

Dima ke ma koçê Îstanbulî kerd, ez tewra çalakîya Mayanê Şemeyî bîya. 29 serrî yo gêrena babî û birayê xo. Nika Warê Galatasarayî ma rê yeno qedexekerdene la dewamê Hîzbullahî HUDA PAR Meclîs de yo. Hem cenazayê ma nêdanê hem zî Warê Galatarasayî ma rê qedexe kenê. HUDA PAR ameye xelatdayene û kewt Meclîs. Rixmo ke ma heqdar ê, ma rê zorbazîye yena kerdene. Nê welatî de edalet çin o.''