Wekîlê DEM Partî yê Colemêrgî û Hetkarê Hemserekanê Pêroyîyan ê DEM PArtî Vezîr Coşkun Parlakî netîceyê weçînayîşanê 31ê adare ANFyî rê ercnayî. 

Parlakî bale ante ser ke komel 8 serrî yo binê tedaya rejîmê AKP-MHPyî de aciz bîyo û tewirê xo sindoqan de mojnayo. Parlakî vat: ''Şaran weçînayîşanê 31ê adare sey firsendêk dî û ercna. Weçînayîşan de şaranê Kurdîstan û Tirkîya zemînê rêxistinîye aferna.''

Parlakî dîyar kerd ke îqtîdarî waşt ke Wan de îradeyê şarî xesp bikero û vat: ''La şar wayîrê îradeyê xo vejîya. Wan de paşdayîşêko komelkî yo cidî ame mojnayene. Seba awankerdişê komarêka demokratîke uca de gamê girîngî erzîyayî. Hinî polîtîkaya şîdetî ya îqtîdarî îflas kerda. Îradeyê komelî est o. Hêrsê komelî zêdîyabi û komelî no eşkera kerd.''

Parlakî îfade kerd ke têkoşîno hempar  tena bi weçînayîşan nêbeno û vat: ''Ganî metodê têkoşînê hemparî tim bêro mojnayene. Weçînayîşan de taktîkan de kêmasî est bîya. La ancî zî Wan de şaran girîngîya îtîfaqî dîye. Îtîfaqê Kede û Demokrasîyî bernameyê xo yê neweyî wextê verê ma de do eşkera bikero. Bi lezî hewceyê ney est o. 

Ganî têkoşîno hempar bêro hîrakerdene. Rojawanê Tirkîya de, Kurdîstan de ganî hêzê demokrasî, azadî, têdûştî û edaletî kom bibê û pîya têbigêrê. Sere de tecrîd heta ke pêro kerdişê antîdemokratîkî biqedê ganî ma bixebitê. Seba caardişê têkoşînê hemparî destê ma ra çi bêro ma do bikerê.''