Wekîlê Partîya Çep a Keske yê Îstanbulî seba turê diyînî yê weçînayîşê serekkomarîye xeylêk qezayan de şarî reyde ameyî têhet û înan komeleyî zîyaret kerdî. 

Qezaya Zeytînburnuyî de Wekîl Celal Firat, Hemserekê HDPyî yê Îstanbulî Ferhat Encuyî Komeleya Hetkarî û Paştdayîşî yê Omerkayîyan zîyaret kerde. Firatî tîya de vat ke seba ke tepişteyî azad bibê, verê demokrasî abibê ganî her kes 28ê gulane de şorê sindoqan ser. Encuyî zî vat ke ganî her kes weçînayîşan de dûştê AKPyî de pozîsyon bigêro.

Qezaya Maltepe de Wekîl Sirri Sureyya Onderî pê heyetê xo Komeleya Xaştaxî ya Motkî zîyaret kerde. Onderî zîyaret de ard ziwan ke îqtîdar pê dek û dolaban kampanyaya weçînayîşî îdare keno û ganî asayîşê sindoqan bêro caardene.

Gazîosmanpaşa de Wekîl Cengîz Çîçek, Wekîlê verênî yê HDPyî Halîl Aksoyî Komeleya Bajarekê Findikî ya Şirnexî zîyaret kerde. Çîçekî zîyaret de vat ke ê do meseleyanê şarî de eleqedar binê. Halîl Aksoyî pare kerd ke ê do weçînayîşan de verê demokrasî abikerê.