Seba grevanê vêşanîye paştdarîya mîyanneteweyîye bena zêde. Wekîlê Swîsre Andreas Kirsteînî vat ke eke hewce bikero ganî ma temsîlkarîya Tirkîya bigîrê

Parlamenterê Lîsteya Alternatîfe Andreas Kirsteînî, Parlamentoyê Zurîhî de heqê qiseykerdişi girewt û qalê grevanê vêşanîye kerd. Kirsteînî waşt ke Swîsre na babete de vengê xo bivejo û mesuldarîya xo bîyaro ca.

Kirsteînî derheqê weçînayîşê 31’ê Adare de va binê zor û tedayanê dewlete de ameyê kerdene û bale ante tecrîdî ser.

Kirsteînî kesê ke seba ke tecrîdî protesto bikerê bi çalakîyanê fedaîyan merdê ardî vîr û wina va: ”Nê merdiman seba ke cuye ra bîyê aciz nê, seba ke bale biance tecrîdî ser xo kişto. Seba ke tecrîd bêro şikitene, grevê vêşanîye bêrê wedarnayene û seba ke teda û zulmê dewlete biqedîyo, sey protesto, nê merdiman çalakîya fedaîye kerda.”

Paştdarîye heqê înano û ganî ma paştdarîye bidê ci

Kirsteînî wina qisey kerd: “Her hetê dinyaye de, bi hezaran kesî kewtê grevê vêşanîye. Çalakwanê grevê vêşanîye tena yew çi wazenê, wedaritişê tecrîdê serê Birêz Ocalanî.
Beno ke ma ra tayê kesî çalakîya bi nê hawayî qebul nêkero, beno ke fehm nêkero. La xoverdayîşê grevê vêşanîye seba Têgêrayîşê Kurd û Têgêrayîşê Çep ê Tirkîya yê hepisxaneyan tarîxî ya. Girewteyê sîyasîyan heta ewro heqê xo bi no qeyde pawitê û vera dewlete de bi nê hawayî vindetê. Naye ra zî ganî ma paştdarîye bidê girewteyanê sîyasîyan û  xora paştdarîye heqê înan a.

Gani ma peynîya bêvengîye bîyarê

Ez hêvî kena ewro ra dima dêsê bêvengîye birijîyo, seba çareserîye ber abibo û paştdarîye bidîyo çalakwananê grevê vêşanîye û seba naye wezîfedarî tê bigêrê. Xora Zurîh û Amed sey bajarê way û birayî yê.  

Eke hewce bikero ma eşkenê temsîlkarîya Tirkîya bigîrê

Ganî Konseya Federal a Swîsre şoro Tirkîya ser û çarçewaya hiqûqî de talebanê çalakwananê girevê vêşanîye bivîno û paştdarîye bido girewteyan. Tirkîya ke cewab nêdo ma, eke hewce bikero Konseya Federal a Swîsre û ma do temsîlkarîya Tirkîya bigîrê. Ganî no derheq de game biqerarî bêrê eştene. Reyna Parlamentoyê Zurîhî zî eşkeno şoro Selahatdarîya Tirkîya ya Zurîhî ser.”