Hetkara Hemserekanê HDPyî ya Komîsyonê Şar û Bawerîyan ra Berpirsîyare ya HDPyî û Wekîla HDPyî Tulaye Hatîmogullari sebebê hêrişan nîjadperestanê ke tewr peyên qezaya Seyhanî ya Anqara de qewimîyabî ANFyî rê ercnayî.

Tulaye Hatîmogullari îfade kerd ke Tirkîya de xîretê kaosî esto û sey verî nika zî dewlete kena ke kurdan û elewîyan reş bikera.

Tulaye Hatîmogullari vat: ''Îqtîdar, hemkarê îqtîdarî, beşêkê muxalefetî û medyaya îqtîdarî ziwanê nîjadperestî mîyanê komelî de aver benê. Feraseto ke Denîze Poyraz kişt û Konya de qirkerdiş kerd heman o. AKP û hemkarê ci armanc kenê ke dîktatorîya faşîste serwer bikerê. Tirkîya de krîzo ekonomîk, bêkarî, şîdet, ziwanî estê. Îqtîdar bîyo mafya û pê metodanê mafya têgêreno. Coka kaos aferneno. Hesabê nê kaosî zî kurd û elewîyî danê.

Armancê ma îtîfaqê demokrasî yo. Tirkîya de têkoşîno tewr serkewte hetê cinîyan ra yeno kerdene. La pêro cinîyî maruzê şîdetî manenê. Ganî ma cîyatîyanê xo bidê kişte û semedê vurîyayîşê welatî têbigêrê, pîya têkoşîn bikerê. Îtîfaqê demokrasî no yo. Pê xurtkerdişê îtîfaqê demokrasî Tirkîya eşkena mîyanê rewşa kaotîke û tarî ra bêra xelisnayene. Semedê awankerdişê komara demokratîke ganî verî dîktatorîya faşîste bêra qelskerdene.''