AKPyî îqtîdarê xo yê 21 serran de tim muracatê kiştişê kurdan kerd. Hukmatê AKPyî kiştişê kurdan binê nameyê 'têkoşînê vera terorî' de xo rê kerd bernameyê weçînayîşan, metodê dîzaynkerdişê komelî û geşkerdişê nîjadperestîya tirkan.

21ê teşrîna peyêne ya 2004î de polîsan verê keyeyê înan de qezaya Qoserî ya Mêrdînî de guleyî varnayî Ugur Kaymazê 12 serrî û babîyê ci Ahmet Kaymazî ser. Walîtîya Mêrdînî bi eşkerayîyêke pare kerd ke di terorîstî pêkewtiş de kişîyayê.

24ê adara 2006î de operasyonê leşkerî yê TSKyî yê Mûşî de 14 gerîlayê HPGyî pê çekanê kîmyewîyan kişîyayî. Merasîmê cenazayanê 6 gerîlayan de Amed de polîsan mudaxele kerd û serebûtî vilayê bi desan şaristanan bîyî. Amed de 5ê ci domanî 10 kesî, Mêrdîn û êlih de 1 pê gule û bombayanê gazî yê polîsan kişîyayî. Serekwezîrê ê çaxî Recep Tayyîp Erdogan wayîrê qirkerdişî bi nê qiseyan vejîyabi: ''Çi cinîye çi doman çita hewce yo do bêro kerdene.''

Bi operasyonê TSKyî 28ê çeleyê 2011î de 17ê ci domanî 34 dewijê kurdî pê teyarayanê leşkerîyan ê F16î ameyî qetilkerdene. Serekwezîrê ê çaxî Erdoganî operasyonî ra semed Serekê Pêroyî yê Artêşa Dewleta Tirke (TSK) Îlker Başbugî rê sipas kerdbi.

14ê çeleyê 2015î de ablûqaya vera Cizîre de cinî û domanî zî tede qasê 300 kesî ameyî qetilkerdene û bi seyan kesî birîndar bîyî. Bi hezaran bînayan zerar dî û bi des hezaran merdiman koç kerd.

11ê gulana 2013î de qezaya Reyhanliyî ya Hatayî de di wesayîtê bombabarkerdeyî teqayî û 52 kesî ameyî qetilkerdene.

7ê hezîrana 2015î de weçînayîşan ra di rojî verî mîtîngê HDPyî yê Amedî de bomba teqaye. Hêriş de 5 kesî ameyî qetilkerdene û qasê 400 kesî birîndar bîyî.

20ê temmuza 2015î de ciwanê ke malzemeyê hetkarîya merdiman berdêne Kobanê raştê hêrişê bi bomba ameyî. Netîceya hêrişê DAÎŞî de ke AKPyî paştî daya ci 33 ciwanê aktîvîstî ameyî qetilkerdene.

10ê teşrîna verêne ya 2015î de Meydanê Garî yê Anqara de DAÎŞî bi bombayan hêrişê mîtîngê haştîye kerd. Nê hêrişî de 103 haştîgerî ameyî qetilkerdene. Wextê qirkerdişî de polîsan mudaxeleyê birîndaran kerd.

28ê teşrîna peyêne ya 2015î de Serekê Baroyê Amedî Tahîr Elçî verê Mînareya Çarlingî ya Amedî de ame qetilkerdene. Newroza 2017î de Amed de polîsan wendekarê zanîngehî Kemal Kurkut qetil kerd. AKPyî kerd ke serê wird qirkerdişan zî bigêro.

20ê tebaxa 2016î de qezaya Şahînbeyî ya Dîlokî de dawetê veyveyê kurdan de hêrişê bi bomba ame kerdene. Veyve de 59 kesî ameyî qetilkerdene. Hukmatê AKPyî serebûtî ra dima cade qedexeyê weşanîyayîşî da û raştîye komelî ra nimnaye. 

HDPyî derheqê nê pêro qirkerdişan de vernîyazê persî dayî Meclîsî la pêro vernîyazê ci zî ameyî redkerdene.