Serekê Gruba Çepgiran a Parlamentoya  Ewropa Francîs Wurtzî vizêr çalakwanê Strasbourgî zîyaret kerdî û peyamê paştdarîye dayî.

“EZ PAŞTDARÎYE DANA XOVERDAYÎŞÊ ŞIMA“

Wurtzî zîyaret de va ganî Serekê Şarê Kurdî Abdulla Ocalan û girewteyê sîyasîyî serbest bêrê raverdayene û wina dewam kerd: “Ez desteg dana nê grevê şima. Ez paştdarîya xo eşkera vana. Ganî tecrîd bêro wedartene. Şîyayîşê Mehmet Ocalanî yê îmralîyî serkewtişê şima yo, la bes nîyo. Seba ke weşîya Ocalanî ca de ya ma bîme zerrîweş. Ganî dîktatorîya Erdoganî tecrîdo ke 3 serrî yo îmralî de domneno wedaro.“

Wurtzî qiseykerdişê xo de va: “Tirkîya de demokrasî çin a, hem bi hezaran kesî hepisxaneyan de yê, hem zî hemverê Rojawanî de amadekarîya hêrişî yena kerdene. Ganî ma nê pêroyînan ver mucadele bikîme“

 ''HER KES TÊKILÎYA ERDOGAN Û DAIŞÎ ZANO“

Wurtzî bale ante têkilîya Erdogan û cîhadîstan ser û wina dewam kerd: “Sîyasetmedar û dîplomat ê Ewropa baş zanê ke mabenê Erdogan û cîhadîstan de senî têkilîye esta, la şantajê Erdoganî yê multecîyan ver vengê xo nêvejenê.“

 ''EZ HEYRANÊ MUCADELEYA KURDAN A“

Wurtzî mucadeleyê Kurdan rê heyranîya xo ard ziwan û va: ‘‘Mucadeleyê azadîye yê Kurdan hetê fehmî ra sey fehmê azadîya ma ya. Mucadeleyo ke Kurdî danê, mucadeleyê pêroyê şaranê bindestan o.  Kurdî Rojakewena mîyanêne de seba erjeyanê merdimahîye mucadele kenê. Mucadeleyê Kurdan de çîyo ke ez hîna zêde heyranê ci ya zî, mucadeleyê cinîyan ê azade yo. Ez seba ke paştdarîye dana mucadeleyê şima, serîberz a. Ganî pêroyê dewletê Ewropa desteg bidê şima.“

Wurtzî qetlkerdişê Sakîne Cansize, Leyla Şaylemeze û Fîdan Dogane zî şermezar kerd û seba ke no derheq de bêveng menda Fransa zî rexne kerde.

 ''HETA ŞIKITIŞÊ TECRÎDÎ DO ÇALAKÎYE DEWAM BIKERO“

Zîyaret de bi nameyê çalakwanan Hemserekê KCD-Eyî Yuksel Koçî qisey kerd.

Koçî wina va: “Ma Kurdî, bi serran o ke seba ke tecrîdê serê Ocalanî bidarîyo we çalakîyan kenîme. Ma kenîme ke vengê xo biresnîme her ca. La sere  de CPT, dewletê Ewropa bêveng manenê. Heta netîce, ma do çalakîyanê xo bidomnîme.“